jivan sahara nepal life

चीनय् नोवल कोरोना भाइरसं छन्हुं हे १०८ म्ह सित !

नेवा: अनलाइन न्युज | २०७६ माघ २८, मंगलबार ११:४३:२१

नोवल कोरोना भाइरसया हुनिं चीनय् म्हिगः सोमवाः छन्हुं हे १०८ म्ह मनूत सीगु दु । वंगु डिसेम्बरय् संक्रमण खनेदये धुंकाः थुखे सीपिनिगु ल्याः थ्व दकले अप्वःगु ल्याः खः ।

चिनियाँ अधिकारीपिन्सं शनिवाः जक सीपिनिगु मृत्युदरय् कमी वःगु धाःसां नं आइतवाः व सोमवाः सीपिनिगु ल्याः अप्वःगु खः । आइतवाः जक हे ९७ म्ह मनूत सीगु खः । सोमवाः सीपिंमध्ये १०३ म्ह हुबेई प्रान्तया खः ।

कोरोनाया हुनिं सीपिनिगु ल्याः थौं मंगलवाः सुथय् तक १,०१८ ल्याः थ्यंगु खः । मू भूमि चीनन्यंकं सोमवाः थप २४७८ म्ह न्हूपिं संक्रमित खनेदूगु दु । थुगु ल्याः आइतवाःया तुलनाय् धाःसा आपालं म्हो खः ।

आइतवाः ३०६२ म्ह न्हूपिं संक्रमित जूगु खः । थ्वलिसें थौं मंगलवाः सुथय् तक चीनय् जक कोरोना भाइरस संक्रमितया ल्याः ४२,६३८ म्ह थ्यंगु राष्ट्रिय स्वास्थ्य आयोगं न्ह्यथंगु दु । चीन पिने २७ गू देसय् ४६० म्हसिबें अप्वः मनूतय्के कोरोना भाइरसया संक्रमण खनेदूगु लुयावःगु दु ।

चीनपिने फिलिपिन्स व हङकङय् छम्ह छम्ह मनू सीगु दु । थ्वहे झ्वलय्, चिनियाँ स्वास्थ्य अनुसन्धानकर्तां कोरोना भाइरसया इन्क्युबेसन ई १४ निसें २४ थ्यंकेमाःगु जुइफूगु धाःगु दु ।
न्हूदँया बिदा क्वचाल

थप याःगु विदा क्वचाये धुंका: सोमवाःनिसें चिनियाँ नागरिक ज्याय् लिहाँ वंगु दु । नोवल कोरोना भाइरस संक्रमणपाखें बचेजुइगु धासें सरकारं लुनार न्हूदँया बिदा थप याःगु खः । सरकारं तःगु प्रतिबन्ध खुकुलो यायेखतं सर्वसाधारण सामान्य जीवनय् लिहाँ वःगु दु । न्हूदँया विदाय् १० न्हु थप याःगु खः । विदा जनवरीया अन्त्यय् क्वचायेमाःगु खः । सोमवाःनिसें ज्याकुथि चाःसां नं अझ नं आपालं बन्द हे जुयाच्वंगु व आपासिनं छेँपाखें हे ज्या यानाच्वंगु समाचार संस्था रोयटर्सं न्ह्यथंगु दु । ज्याय् वंपिं नं ख्वालय् मास्क तयातःपिं जक खनेदु ।

गन गुलि संक्रमित ?

चीन – १०१६ मृत्यु, ४२,६३८ संक्रमित
हङकङ – १ मृत्यु, ४२ संक्रमित
फिलिपिन्स – १ मृत्यु, ३ संक्रमित

संक्रमित जक

जापान – १६१
सिंगापुर – ४५
थाइल्याण्ड – ३२
दक्षिण कोरिया – २८
ताइवान – १८
अस्ट्रेलिया – १५
मलेसिया – १८
जर्मनी – १४
भियतनाम – १४
अमेरिका – १३
मकाओ – १०
क्यानडा – ७
फ्रान्स – ११
यूएई – ८
इटाली – ३
भारत – ३
बेलायत – ८
रुस – २
श्रीलंका – १
कम्बोडिया – १
फिनल्याण्ड – १
नेपाल – १
स्विडेन – १
स्पेन – १
बेल्जियम – १

Categorized in अन्तर्राष्ट्रिय