jivan sahara nepal life

चीनया वुहानं उद्धार याइपिं नेपालीं शर्तनामाय् ल्हाःचिं तयेमाःगु

नेवा: अनलाइन न्युज | २०७६ फाल्गुण २, शुक्रबार १०:४६:४७

नेपाल सरकारं कोरोना भाइरस संक्रमणया लिच्वः लाःगु चीनया वुहानय् च्वंपिं नेपाःमिपिन्त कन्हय् फागुन ३ गते शनिवाः उद्धार यायेगु तयारी याःगु दु ।

नेपालय् क्वारेन्टाइन लिसेंया फुक्क तयारी पूवनेधुंकाः उपिं नेपालीपिन्त हयेत्यंगु खः । उद्धार यायेन्ह्यः नेपालीपिन्सं मञ्जुरीनामा यायेमालीगु जूगु दु ।

चीनया राजधानी बेइजिङय् च्वंगु नेपाली दूतावासं पिकाःगु सुचं कथं ६ बुँदे शर्तत पालना याये धैगु शर्तनामा यायेमालीगु जूगु दु ।

शर्तय् सरकारं क्वःछ्यूगु क्वारेन्टाइनय् १४ निसें १७ दिंतक च्वनेमाः धैगु दुसा थःथितिपिन्त नापलाये मदइगु शर्त नं दु ।

शर्तनामा पालना यायेत सहमत जूगु व पालना मयाःसा कानून कथं सहयाये, बुझेयाये धका: शर्तनामाय् ल्हाःचिं तयेमाःगु दूतावासं जानकारी ब्यूगु दु ।

चीनया वुहानं उद्धार याइपिं नेपालीपिन्त खरिपाटीइ तयेगु सरकारया तयारी दु ।

Categorized in राष्ट्रिय