chetrapa55

चलचित्र विकास कम्पनीया २० रोपनी जग्गा गायब : कम्पनी रजिष्ट्रारं फाईल हे तन !

नेवा: अनलाइन न्युज | २०७६ श्रावण २३, बिहिबार १४:४९:२२

‘बालाजुया जग्गा ग्व ? नेपाःया संकिपाया विकासया नितिं ब्यूगु जग्गा व्यक्तिं क्याप्चर यानाः मोजमस्ती याये ज्यूला ? आः लःया तःलय् वंसां नं त्वःतेमखु ।’

चलचित्र विकास बोर्डया १९ क्वःगु वार्षिक उत्सव ज्याझ्वलय् संचार व सूचना प्रविधिमन्त्री गोकुलप्रसाद बास्कोटां प्वंकूगु धारणा खः थ्व ।

येँया बालाजुइ च्वंगु थःगु २० रोपनीसिबें अप्वः जग्गा सुनां मियाः नल धैगु विषयस सम्बद्ध पक्ष हे आःतक अनभिज्ञ खनेदु । मन्त्री बास्कोटां कडा ढंगं ख्याच्वः बिइधुंकाः बोर्डं चलचित्र विकास कम्पनीया जग्गा गन, गुलि दु धकाः न्यनेकने यात ।

मन्त्रीं धाःथें ‘लः तःलय् वंसां नं मत्वःतेगु’ धासें बोर्डं जग्गाया छानबिन मन्ह्याकागु मखु । तर, सरोकारवाला निकाय सुनां नं छानबिनय् ग्वाहालि मयाःगु बोर्डया पदाधिकारीपिन्सं धाःगु दु ।

बोर्डया नायः केशव भट्टराई नं धाःगु दु, “जिमिसं मुकं ६.७५ रोपनी जग्गा दूगु तथ्य लुइका । जबकि चलचित्र विकास कम्पनीया मुक्कं जग्गा २७ रोपनी खः ।”

कम्पनी रजिष्ट्रार ज्याकुथिं फाईल हे गायब

चलचित्र विकास बोर्डं थःगु जग्गाया अवस्था लुइकेत कम्पनी रजिष्ट्रारया ज्याकुथि, औद्योगिक क्षेत्र व्यवस्थापन लिमिटेड, शेयर कारोवार याइगु संस्था लिसेंयात पौ छ्वःगु खः । तर, सुनानं जग्गाबारे विस्तृत जानकारी बिइ चाहेजूगु खनेमदु ।

कम्पनी रजिष्ट्रारया ज्याकुथिं बोर्डसम्बन्धी फाईल हे मदूगु गैरजिम्मेवार लिसः छ्वयाहःगु दु । भूमाफियालिसेया मिलेमतोय् फाईल गायब याःगु बोर्डया पदाधिकारीपिन्सं आशंका याःगु दु ।

बोर्डया छम्ह पदाधिकारीं धाःगु दु, “नियत सफा जूगु खःसा ला फाईल मालाच्वना, सुनानं सुचुकातःगु खःसा कारवाही याये धैगु कथंया लिसः वइगु जुइ नि । भूमाफियालिसे मिलेमतो मजूसा थुलिमछि फाईल सुचुकेगु हिम्मत सुनानं याइमखु ।”

औद्योगिक क्षेत्र व्यवस्थापन लिमिटेड व शेयर कारोवार याइगु संस्थां नं चित्त बुझेजू कथंया लिसः मब्यूगु बोर्डया उम्ह पदाधिकारीं जानकारी ब्यूगु दु ।

नीजिकरणया मार

नेपाली संकिपा उद्योगया विकास यायेगु व संकिपापाखें जनताया सेवा यायेगु धासें २०२८ सालय् शाही नेपाली चलचित्र संस्थान पलिस्था जुल । राष्ट्रिय संचार योजना कथं पलिस्था जूगु थुगु संस्थानं छुं संकिपा निर्माण नं यात ।

पंचायती व्यवस्थाया अन्त्य धुंकाः २०४८ सालय् शाही नेपाली चलचित्र संस्थानया नां नेपाल चलचित्र विकास संस्थान तल । राष्ट्रिय संचार नीति २०४९ य् चलचित्र विकास संस्थानयात नीजिकरण यायेगु व्यवस्थ यात ।

सरकारया वहे नीति कथं २०५० कार्तिक २६ गते बहुमत सेयर बिक्री यात । उगु इलय् ५१ प्रतिशत सेयर ६ करोड ४६ लख ६२ हजार तका दामं म्यूगु खः । ल्यंदूगु ४९ प्रतिशतमध्ये २४ प्रतिशत चलचित्रलिसे सम्बन्धित व्यक्ति, २० प्रतिशत सर्वसाधारण व ५ प्रतिशत संस्थानया हे कर्मचारीयात ब्यूगु खः ।

वधुंकाः कम्पनी ऐन कथं नेपाल चलचित्र विकास कम्पनी लिमिटेडया रुपं दर्ता यात । चलचित्र विकास संस्थान नीजिकरणय् लाःगु न्हापांगु सरकारी संचार संस्थान खः । कम्पनी ऐन कथं दर्ता जुइधुंकाःया निगू दशकय् २० रोपनीसिबें अप्वः जग्गा गायब जूगु खः ।

चाःचाःहिला हाकनं मन्त्रालय दुने हे

सूचना व संचार प्रविधि मन्त्री बास्कोटां चलचित्र विकास बोर्डयात बालाजुया जग्गा खोजबिन यायेत ब्यूगु निर्देशन हाकनं मन्त्रालय दुने हे लिहाँ वःगु दु । बोर्डयात सम्बन्धित निकायं माःगु जानकारी मबिइधुंकाः मन्त्रालय थःम्हेस्यां हे जग्गाया छानबिन यायेत्यंगु दु ।

विकास बोर्डं ग्वाहालि मयाःगु संस्थाया नां व विवरण लिसेंया पौ मन्त्रालयस छ्वःगु दु ।

मन्त्रालयया प्रवक्ता ऋषिराम तिवारीं बालाजुया जग्गा सम्बन्धय् बोर्डपाखें पौ वःगु धाःगु दु । वं धाःगु दु, “जग्गाया विषयस यथार्थ विवरण मालेज्या याःबलय् माःगु ग्वाहालि कायेमखंगु व्यहोराया पौ मन्त्रालयस थ्यंकूगु दु ।”

बोर्डया नायः केशव भट्टराई नं थःम्हं मन्त्रीयात जग्गा बारे स्यूगुतकया जानकारी बियागु धाःगु दु ।

Categorized in राजनीति