swastha 76 12 19

गुथि समितिया ज्या कोरोना लिपा जक

नेवा: अनलाइन न्युज – ललेन्द्र शाक्य | २०७६ चैत्र ११, मंगलबार १६:२७:५७

विवादय् लानाच्वंगु गुथि विधेयक बारे नेवाः समुदायया सुझाव कायेत भूमिसुधार मन्त्रालयं नीस्वंगु समितिया संयोजक लिसें प्रदेशसभाया सांसद जीवनराम श्रेष्ठं देसय् कोराना भाइरसया सन्त्रास ब्वलनाच्वंगु इलय् लाक्क समिति नीस्वंगु खँयात छगू संयोग जक खः धासें उकियात अन्यथा रूपं मकायेत इनाप यानादीगु दु ।

कोरोना संक्रमण पनेगु नितिं सरकारं ‘लकडाउन’ याःगु इलय् हे गुथि सम्बन्धी समिति तकं नीस्वंगु खँय् थीथी न्ह्यसः वयाच्वंगु सन्दर्भय् सांसद श्रेष्ठं थ्व खँ कनादीगु खः ।

गुथि सम्बन्धी आन्दोलनया न्ह्यलुवाःपिं व गुथियारपिंलिसे जुयाच्वंगु खँल्हाबल्हाया लिधंसाय् हे थ्व समिति नीस्वंगु खः धासें प्रक्रिया वनाच्वँच्वं थ्व इलय् वयाः नीस्वंगु जानकारी नं वय्कलं बियादिल ।

समितियात रिपोर्ट बीगु नितिं लच्छिया ई बियातःगु खःसां थ्व लछि धइगु समितिया न्हापांगु बैठक च्वंगु न्हिनिसें शुरु जुइगु जूगुलिं बैठक न्ह्यः हे आपालं अनौपचारिक खँल्हाबल्हा यानाः लिपा माइन्युट जक औपचारिक रूपं यायेगु वा समितिया म्याद हे थपे यायेफइगु विकल्पत दुगु खँ नं वय्कलं कनादिल ।

सरकारं ‘लकडाउन’या इलय् समिति नीस्वंगु खःसां थ्व प्रतिकुल स्थितिइ समितिं थःगु ज्याखँ धाःसा मन्ह्याकीगु खँ नं वय्कलं कनादिल ।

भाजु श्रेष्ठं धयादी,‘आः जुयाच्वंगु कोरोनाया सन्त्रास सामान्य जुइधुंकाः जक समितिं ज्या न्ह्याकी । समितिपाखें सम्बन्धित गुथियार व गुथि आन्दोलनया न्ह्यलुवाःपिंलिसे आपालं खँल्हाबल्हा यानाः जक प्रतिवेदन तयार याइ, उकी सुनां नं शंका यायेम्वाः ।’

समितियात गुथि सम्बन्धी संघर्ष समितिपाखें नं प्रतिनिधि थपे यायेगु अधिकार बियातःगु दु । थ्व प्रतिनिधिपिं नं संघर्ष समितिलिसे सहलह यानाः हे कायेगु खँ नं सांसद श्रेष्ठं कनादिल ।

Categorized in राजनीति