ad 2076 5 18

गुथि संस्थानया प्रमुखयात जनहस्ताक्षर लःल्हात

नेवा: अनलाइन न्युज | २०७६ भाद्र ८, आइतबार १३:३९:००

गुथि संस्थानं नीजि कम्पनीलिसे जानाः येँया ऐतिहासिक असंया कोथुननी व कोथुननी दुने च्वंगु नेपाःया म्हसीका कथं धस्वानाच्वंगु अशोकवृक्ष महाविहारया दुने विराजमान अभिताभ बुद्ध न्हंकाः ब्यापारिक कम्प्लेक्स दयेकेत्यंगुयात स्थानीय बासिन्दापिन्सं तच्वकं विरोधया सः थ्वयेकाः वयाच्वंगु दु ।

थुगु विरोधया झ्वलय् कोथुननी बचाऊ अभियान हे नीस्वनाः संघर्षया थीथी ज्याझ्वःत न्ह्याकाः वयाच्वंगु दुसा छुं दिं न्ह्यः जक कोथुननी संरक्षणया नितिं थीथी थासं जनहस्ताक्ष मुंकेगु ज्याझ्वः नं याःगु खः । थ्यंमथ्यं नीद्वलं मल्याक जनसमुदायपिनिगु हस्ताक्षर मुंके धुंकाः उगु कोथुननी बचाऊ अभियानं उगु जनहस्ताक्षर गुथि संस्थानयात लःल्हायेगु क्वःछ्यूगु खः ।

वहे क्वःछिनाकिथं थौं आइतवाः असनं तःजिक जुलुस पिकयाः येँया त्रिपुरेश्वरय् च्वंगु गुथि संस्थानया ज्याकूतक थीथी प्लेकार्ड ब्वज्या यानाः थ्यंकूगु खः ।

थौं आइतवाः जुलुस क्वचायेधुंकाः कोथुननी बचाऊ अभियानं थीथी थासं मुंकूगु जनहस्ताक्षर गुथि संस्थानयात लःल्हायेगु ज्या जनं जूगु खः ।

उगु जनहस्ताक्षरलिसें ज्ञापन पौ कोथुननी बचाऊ अभियानया कजि नमस्ते सायमिं गुथि संस्थानया प्रमुखयात लःल्हाःगु खः । जनहस्ताक्षर व ज्ञापन पौ लःल्हानाः कायेधुंकाः कार्यान्वयनया नितिं पलाः न्ह्याकेगु गुथि संस्थानया प्रमुखं प्रतिबद्धता जाहेर याःगु खः ।

Categorized in राष्ट्रिय