raj medeya

गुथि विधेयक ः सहलह ब्याकेत भूमिसुधार मन्त्रालयं स्वनिगःबासीपिन्त सःतल

नेवा: अनलाइन न्युज – ललेन्द्र शाक्य | २०७६ जेठ २९, बुधबार १४:३४:५९

जनमानस दथुइ तनावया रुपं तच्वः जुयाच्वंगु गुथि ऐन विधेयकयात कयाः सहलह ब्याकेगु नितिं भूमिव्यवस्था, सहकारी व गरीबी निवारणमन्त्री पद्माकुमारी अर्यालं थौं बुधवाः न्हिनय् ३ ता इलय् भूमिसुधार मन्त्रालयस स्वनिगःबासीपिन्त सःतूगु दु ।

नेवाः अनलाईनन्यूजयात जानकारी वःगु कथं मन्त्री अर्यालं स्वनिगःया प्रतिनिधिसभालिसें प्रदेशसभाया सांसदपिं, सरोकारवालापिं, गुथिलिसे आबद्धपिं व आन्दोलनय् आबद्धपिन्त सःताः विशेष सहलह यायेत्यंगु खः ।

गुथि विधेयकयात कयाः स्वनिगः दुने जक मखु, स्वनिगः पिने थीथी जिल्लाय् नं विरोधया सः थ्वयेधुंकाः व उगु सः गुनुनुँ च्यानावःगु तायेकाः मन्त्रालयं थथे सहलह ब्याकेत्यंगु खँ सीदूगु दु ।

तर स्वनिगः दुने गुथि विधेयकया विरोधय् आन्दोलनय् क्वाहाँ वयाच्वंपिं उगु मन्त्री अर्यालं सःतूगु सहलह ज्याझ्वलय् मवनीगु खँ नं सीदूगु दु ।

स्रोतं ब्यूगु जानकारी कथं आन्दोलन न्ह्याकाच्वंपिन्त फोनया माध्यमं जक उगु सहलह ज्याझ्वलय् सःतूगु व पौ च्वयाः आधिकारिक रुपं उगु सहलह ज्याझ्वलय् ब्वति कायेत निमन्त्रणा मवःगुलिं मन्त्रीं सःतूगु उगु सहलह ज्याझ्वलय् मवनेगु निर्णय जूगु खँ धाःगु दु ।

भूमिव्यवस्था, सहकारी व गरीबी निवारणमन्त्री पद्माकुमारी अर्यालं म्हिगःतक गुथि विधेयक संविधान पायछि कथं वःगु धाःगु खःसा थौं वयाः थुकथं स्वनिगःया सकल सांसदलिसें सरोकारवाला, गुथिलिसे आवद्धपिं व आन्दोलनय् आवद्धपिन्त थुकथं आकाझाकां सःताः विशेष सहलह ब्याकेत्यंगुलिं आः छुं हिउपाः वइ धकाः सचेत नागरिकपिन्सं थःथःगु विचाः प्वंकाहःगु दु ।

Categorized in राजनीति