ad 2076 5 18

गुथियात कयाः नेवाः समुदायया अवधारणा न्ह्यब्वल

नेवा: अनलाइन न्युज – ललेन्द्र शाक्य | २०७६ भाद्र ४, बुधबार १८:०५:२७

गुथि विधेयकविरुद्ध एकीकृत आन्दोलन न्ह्याकेगु नितिं थौं बुधवाः नेवाः देय् दबूया ज्याकुथिइ च्वंगु मुँज्या गुथि–नेवाः समुदायया अवधारणा व गुथि विधेयकविरुद्ध एकीकृत आन्दोलनया संचालनया कार्यविधियात कयाः सहलह जूगु दु ।

गुथि विधेयकविरुद्ध एकीकृत आन्दोलनया न्वकू पवित्र बज्राचार्यं बियादीगु जानकारी कथं थौंया मुँज्यां एकीकृत आन्दोलनया निर्देशिका पुचःया दुजःलिसें नेवाः न्ह्यलुवाः मल्ल के. सुन्दरं गुथिइ नेवाः समुदायया अवधारणा न्ह्यब्वयादीगु खः ।

भाजु सुन्दरं उगु अवधारणाय् गुथिया ऐतिहासिक पृष्ठभूमिलिसें गुथिया मौलिक प्रथा, गुथि प्रथाजन्य संस्थाया सम्बन्धय् दुग्यंक खँ न्ह्यब्वयातःगु दु । लिसें उगु अवधारणाय् गुथि सम्बन्धय् राज्यपाखें गुगु नं व्यवस्था यायेन्ह्यः गुथियात कयाः सकतां पक्ष व प्रथायात ध्वाथुइकेमाःगु, राज्यं संयोजनकारीया भूमिका जक म्हितेमाःगु खँ न्ह्यथनातःगु दु ।

अथेहे, गुथिया स्वायत्तता सम्बन्धय् अवधारणा पतिइ थौंया हिलावंगु राजनीतिक व प्रशासनिक परिवेशय् आदिवासी नेवाःत प्रथाजन्य गुथि संस्थायात ल्यंकातयेगु नितिं दकले पायछिगु विकल्प धैगु आदिवासी समुदाययात थःथःगु ऐतिहासिक थासय् थःपिन्सं हे थःगु कथं हे स्वायत्त व स्वशासनया अधिकार छ्यलेगु सुनिश्चित यायेगु खः । राज्यसत्ता स्वायत्त व स्वशासन अनुकूल मजूतले समुदायपाखें न्ह्याकाः वयाच्वंगु गुथिथें जाःगु प्रथाजन्य संस्थात नं वार्षिक रुपय् स्वायत्त वा राज्य हस्तक्षेपपाखें मुक्त जुइफइमखु धकाः न्ह्यथनातःगु दु ।

अथेहे, गुथि स्वायत्तताया सवालय् उगु अवधारणाय् स्वायत्तता व स्वशासनया मान्यता कथं नेपाल सरकारपाखें नकतिनि हे गुथि सम्बन्धी विधेयक न्ह्यःने हयाः गुथियात छगू गैर सामाजिक संस्थाया दर्जाय् तयाः प्रचलित कानून अन्तर्गत नियमन यायेत स्वःगु ज्या परम्परागत मान्यता, गुथिया विशिष्ट भूमिका व प्रारम्भिक कथं पायछि मजूगु सामान्यतः छगू प्रथाजन्य संरचनायात प्रचलित कानूनकथं परिसी मन यायेगु अन्तर्राष्ट्रिय कानून कथं तसकं आपत्तिजन्य खँ खः धकाः न्ह्यथनातःगु दु ।

थौंया मुँज्याय् नेवाः न्ह्यलुवा सुन्दरं न्ह्यब्वयादीगु अवधारणा परिष्कृत यानाः यंकेगु कथं पारित नं याःगु दु ।

अथेहे, थौंया मुँज्याय् एकीकृत आन्दोलनया मेम्ह दुजः डा. पुष्पराज राजकर्णिकारं आन्दोलन परिचालन यायेगु नितिं कार्यविधि न्ह्यब्वयादीगु खः । उगु कार्यविधि नं मगाः मचाः तनाः पारित याःगु खः ।

गुथि विधेयकविरुद्ध आन्दोलनयात उपलब्धीपूर्ण यायेगु नितिं गुथि विधेयक आन्दोलनय् ब्वति काःपिं व थथिी संघर्ष समितिया मंकाः कथं डा. महेशमान श्रेष्ठया नेतृत्वय् गुथि विधेयकविरुद्ध एकीकृत आन्दोलन नीस्वंगु खः ।

Categorized in नेवाः