telecom 18 kartik 2076

गुगु कथं जुल पञ्चदानया उत्पति ?

प्राडा चुण्डा बज्राचार्य
पञ्चदानया उत्पति बारे भाजु पुण्यरत्न बज्राचार्य थुकथं न्ह्य ब्वया बिज्याःगु दु । श्रावणशुक्ल अष्टमी तच्वतं तःधगु पर्वया दिं खः । परापूर्वकालस थ्व दकसिंबे
न्हापा श्री ब्रम्हां थःगु मूलगु छ्यं महाद्यवं ध्यंकाः श्री दीपंकर बुद्ध भगवानयात दान यानाःबिज्याःगु जुयाच्वन । वयां लिपा थ्वकुन्हु हे यल देशय् दीपावलती नगर
(गयित देशयाम्ह बुद्धिमान जुजु श्री सर्वानन्दं दानशाला दयेकाः श्री दीपंकर बुद्ध भगवान व वसपोलया संघयात वा जाकि वसः, दक्षिणा व मेमेगु नं वस्तु, लुँयागु
पिण्डपात्रय् तयाः दान यानाः बिज्याःगु जुयाच्वन । हानं थ्वकुन्हु हे यलयाम्ह छम्ह कन्याम्ह म्ह्याय्मचा छम्हसिनं दिपंकर बुद्ध भगवान यात पिण्डपात्र दान याःगु
जुयाच्वन । उम्ह म्ह्याय्मचा छ्यला वंगु छुं छुं वस्तु व मूर्ति थौं कन्हय् तकं गुंपुन्हि ज्वःछि गुइत बहिलिइ ब्वयाः क्यनेगु यानाः वयाच्वंगु दु । उकिं हे यलया
श्रावणशुक्ल अष्टमीकुन्हु पञ्चदान नखः हनेगु यानाःवया च्वंगु खः ।



अथें तुं यँय् भाद्रकृष्ण त्रयोदशीशकुन्हु हनेगु बारे वज्र महाकाल तन्त्रय् वज्रसत्व वचन व पिण्डपात्र अवदानया वाचन धकाः थुकथं न्ह्य ब्वयातःगु दु । भाद्रकृष्ण
त्रयोदशीकुन्हु सत्य त्रेता, व्दापर व कली प्यंगू युगया छगू हे दिं लाःगु दिन खः । थ्वकुन्हु यानागु दानया फल असंख्य दु धयागु खँ सिइकाः मनूतय्सं चूडाकर्म
याये धुंक्को फुक्क बज्राचायृ व शाक्य भिक्षुपिंत पिण्डपात्र व अन्न आदि  वस्तु दान यात धाःसा मनं तातुनागु फल दइ । हानं गंगु कय्गु मुस्या आदि तयाः
क्वाति त्वनेगु यायेगु ज्यां यायेगु ज्यां यानाः अनेगु ल्वय् व व्याधि नाश जुइ ।

सिद्धार्थ गौतमं महाभिनिष्क्रमण धुंकाः थःम्हं तपस्या यानाः बोधिज्ञान प्राप्त याये धुंकाः थःगु ज्ञान थः नापं थंः भिक्षुगणपिं ब्वनाः थःगु हे दरबारय् व दरवार
नापनापंया छेँय् छेँय् भिक्षाटन यानाः बिज्याःगु दिं नं खः । थ्वकुन्हु हे भगवान बुद्धं भिक्षातन याथें बज्रचार्य, शाक्य, बुद्धाचार्य आदि चूडाकर्म याये धुंकूपिं नं थःगु
छेँया नापनापं थाय् थासय् वनाः भिक्षाटन यानाः वयाच्वंगु दिं पञ्चादान खः ।



चूडाकर्म याये धुकूपिं काय्मचा मिजंतय्त थी थी वस्तु नसा दान बीगु पञ्चदान, नरां व सम्यक दान खः । यँेय् १२ दँय् छक्वः यल, ख्वप येँ बनेपा आदि स्वनिगः
द्यःद्यःपिं नापनापं बहीद्यः पञ्चधानद्यः स्वयम्भूया भुइख्यलय् यंके न्ह्यः येँया लाय्कु दरवारय् दर्ता याये माःगु जूगुलिं सम्यक छन्हु न्ह्यः हनुमानध्वाखाय् तय्गु
चलन दु । अन लिपा द्यःद्यःपिं जुजु व बरे छुइधुंकूपिं बज्राचार्य, शाक्यपिं इवःहे छुना, गते हे घ्यःचाकु संल्हकुन्हु ख्वपया भुइख्यलय् दँय्दसं पञ्चदान जुइगु खः ।
यलय् श्रावण शुक्ल अष्टमी नागबहालय् जुइगु खः ।