nepal lifef 2076 8 8

ख्वपय् ‘उज्यालो भक्तपुर अभियान’ न्ह्यात

नेवा: अनलाइन न्युज | २०७६ श्रावण २८, मंगलबार १२:१२:२७

ख्वपयात दीपावलीथें सदां झलमल्ल यायेगु उद्घोष यानाः वयाच्वंम्ह सांसद लिसें पूर्व उद्योगमन्त्री महेश बस्नेतं ‘उज्यालो भक्तपुर अभियान’ न्ह्याकुगु दु ।

सोमवाः बहनी ८ ता इलय् सूर्यविनायक नगरपालिका वडा ल्याः ७ या गुण्डु चुकं खहरेतकया २ किलोमिटर दुरीया मू सतकय् जडान याःगु ३० प्वाः सौर्य मत छक्वलं च्याकाः बस्नेत. अभियान न्ह्याकुगु खः ।

उगु ज्याझ्वलय् बस्नेतं नेपालय् क्वचाःगु लगानी सम्मेलनया इलय् चिनियाँ कम्पनीलिसे थःम्हं यानागु अनौपचारिक संवादं औपचारिक स्वरुप काःबलय् ख्वपयात झःझः यायेगु अभियानया सुरुवात जूगु धाःगु दु ।

बस्नेतं धाःगु दु, “विगतय् यक्व दँनिसें लोडसेडिङ लिसेंया थीथी हुनिं खिउँगु थासय् च्वनेत बाध्य थनया बासिन्दाया नितिं आः न्ह्याबलें स्वन्ति नखःया ई दिपावलीथें झःझः धाःगु लकस ब्वलंगु दु । प्रधानमन्त्री रोजगार कार्यक्रमय् लच्छितक ज्या याःपिं युवापिन्सं स्वयंसेवी रुपं मत जडान ज्याय् ग्वाहालि याःगुलिं सुभाय् बियाच्वना ।”

ख्वपया गुण्डु ‘मर्निङ्ग वाक’ याइगु जक मखुसे आःया दिनय् ‘इभिनिङ्ग वाक’ यायेगु थाय् कथं न. म्हसीका दइ धासें बस्नेतं ख्वपया ज्यापाखें प्रभावित जुयाः ग्वाहालिमि दातापिं विकासया नितिं ग्वाहालि यायेत मात्तु माला वइगु धाःगु दु ।

बस्नेतं धाःगु दु, “छुं दँ न्ह्यःतक विकास मामां ख्वप चाःहिलीगु खः, आःया दिनय् ख्वपं विकास मालेगु मखु, विकासं ख्वप मालाः वइगु जुयाच्वंगु दु । आः ख्वपं विकासय् तीव्ररुपं हिउपाः हइ ।”

ख्वपयात हरित सहरया रुपं विकास यायेगु आज्जुं कौशलटारं सिरुटारतकया सतकय् हरियाली सतक अभियान न्ह्यानाः सिमा पिइगु ज्या जूगु धासें बस्नेतं अज्यालो अभियान व हरियाली अभियान जिल्ला न्यंकं विस्तार यायेगु खँया जानकारी ब्यूगु दु ।

ज्याझ्वलय् वडा ७ या नायः रवीन्द्र सापकोटां नगरपालिकायात झःझः धायेकेगु अभियान गुण्डुपाखें न्ह्याःगु धाःगु दु । चिनियाँ कम्पनी ग्यान्सु नेचुरल इनर्जी रिसर्च इन्स्टिच्युटं २५ लख तकाया लगानी यानाः सतकय् सौर्य मत जडान याःगु सापकोटां धाःगु दु । सापकोटां मत जडित सतकया सुचुपिचु यासें थुकियात हरियाली यायेगु अभियानतकं न्ह्यःने यंकेगु धाःगु दु ।

Categorized in स्थानिय-समाज