telecom 18 kartik 2076

क्वचाल थौं नं मोहनी, महालक्ष्मीया पूजा आराधना यात

नेवा: अनलाइन न्युज | २०७६ आश्विन २६, आइतबार ११:१५:२९

आश्विन शुक्ल पारुया दिंनिसें न्ह्याःगु थुगु दँया मोहनी नखः थौं पुन्हीया दिं नं क्वचाःगु दु ।

मोहनी नखःया दकले लिपांगु दिं थौैया दिंयात कोजाग्रत पुन्ही धाइ । थौंया दिं सम्पन्नताया देवी महालक्ष्मीया पूजा आराधना यानाः चच्छि मद्यंसे १५ न्हु ताःहाकःगु मोहनी नखः क्वचायेकीगु प्रचलन दु ।

माता दुर्गा भवानीया स्वंगू रुपमध्येया छगू रुप महालक्ष्मीया पूजा यानाः थौं दुर्गा पक्षयात बिदा याइ । नवरात्र मोहनीया हे दिं क्वचाइगु जूसां नं दुर्गा पक्ष धाःसा आश्विन शुक्ल पुन्हीया दिं क्वचाइ ।

लक्ष्मीपूजाया १५ न्हु न्ह्यः महालक्ष्मीया आराधना याइगु जूगुलिं थुगु नखःया विशेष महत्व दु । थ्व पुन्हीयात कौमुदी नं धाइ ।

थौंया दिं सायंकालय् महालक्ष्मीया पूजा आराधना यानाः चच्छि चा च्वंपिं मनूतय्गु छेँय् पृथ्वी भ्रमण यानाः वःम्ह महालक्ष्मी दुहाँ वयाः धन, ऐश्वर्य बियाः सम्पन्न याकीगु धार्मिक विश्वास दु ।

आकाशदीप दान, कार्तिक स्नान न्ह्यात

थथेहे, सौभाग्य, सम्पत्ति, श्रेय प्राप्तिया नितिं थौंनिसें आकाशदीप दान नं न्ह्याइ । आकाशदीप दान अप्वः धयाथें पँ, मदुसा पलाँस, खयर, पीपल आदिया यःसिं थनी । आकाशदीप दान भगवान् विष्णुयात समर्पण यानाः च्याकेगु याइ ।
आश्विन शुक्ल पुन्हीनिसें कार्तिक शुल्क पुन्हीतक कार्तिक स्नान यानाः छेँय् छेँय् विशेष रुपं याइगु तुलसी पूजा नं थौंनिसें हे न्ह्याइ । तुलसी पूजा सूर्द्यः त्वये न्ह्यः हे यानाः क्वचायेकेमाःगु मान्यता दु । आश्विन शुक्ल पुन्हीनिसें कार्तिक स्नान याःसा महापातकनिसें नं मुक्त जुइगु धार्मिक विश्वास दु ।

कार्तिक स्नात याइपिन्सं थौंनिसें कार्तिक शुक्ल पुन्हीतक निगू दल दूगु माय्, मुसू, मू, चाना, मुस्या इत्यादी अन्न नये मज्यूगु शास्त्रिय मान्यता दु ।

Categorized in राष्ट्रिय