chetrapa55

कोहलपुर प्रकरण ः गृहमन्त्री बादलया राजीनामा माग, येँय् विरोध प्रदर्शन

नेवा: अनलाइन न्युज | २०७६ मङ्सिर २३, सोमबार १२:५३:३६

कोहलपुर घटनाया विरोधय् येँय् विरोध प्रदर्शन याःगु दु । आइतवाः बाँकेया कोहलपुरय् प्रहरीं विद्यार्थीपिन्त दमन याःगु धासें नेविसंघं येँया चाःबहिलय् विरो प्रदर्शन याःगु खः ।

नेविसंघ येँ जिल्ला समितिया ग्वसालय् व पशुपति क्याम्सप ईकाई समितिया संयोजनय् याःगु विरोध प्रदर्शनय् सहभागीपिन्सं प्रहरी दमनया विरोध यासें नाराबाजी यात । इमिसं गृहमन्त्रीया तकं राजीनामा माग याःगु खः ।

पशुपति क्याम्पसं न्ह्याःगु विरोध जुलुस चाःबही चोक चाःहिलाः हाकनं पशुपति क्याम्पसय् वयाः समापन याःगु खः । नेविसंघया नेता मनोज वैद्यं धाःगु दु, “कोहलपुरय् प्रहरी दमनपाखें घाःपाः जूपिं विद्यार्थीपिन्त सरकारं निःशुल्क वासः यायेमाः । अथेहे, स्कूल वसतय् वःपिं विद्यार्थीपिन्त गोली क्ययेकेगु आदेश ब्यूम्ह गृहमन्त्रीं राजीनामा बिइमाः ।”

आइतवाः सुथय् छगः ट्रकं ठक्कर बियाः ७ गू तगिमय् ब्वनाच्वंम्ह कोहलपुर १० या प्रकृति चन्द तच्वकं घाःपाः जुइधुंकाः नेपालगञ्ज–कोहलपुर सतकखण्डय् प्र्रदर्शनकारी व प्रहरीदथुइ ल्वापु जूगु खः । स्थिति नियन्त्रणय् कायेत प्रहरीं रबरया गोली, लाठी व अश्रुग्यास प्रहार याःबलय् विद्यार्थीलिसें छगू दर्जनसिबें अप्वः घाःपाः जूगु दु । प्रदर्शनकारीया आक्रमणपाखें इलाका प्रहरी ज्याकुथि कोहलपुरया डिएसपी हेमराज शाहीलिसें ९ म्ह प्रहरी नं घाःपाः जूगु दु । कोहलपुर अशान्त जुइधुंकाः स्थानीय प्रशासनं निषेधाज्ञा जारी याःगु दु ।

ट्रकया ठक्करं तच्वकं घाःपाः जूम्ह चन्दयात वासः यायेगु नितिं सेनाया हेलिकोप्टरपाखें यलया बीएण्डबी अस्पतालय् हःगु दु । चन्दयात ठक्कर ब्यूगु ट्रकयात प्रदर्शनकारीपिन्सं घटनास्थयलय् हे च्याकाब्यूगु दु ।

Categorized in राजनीति