swastha 76 12 19

कोरोना रोकथाम : नियन्त्रण व उपचार कोषय् सुनां सुनां यात करोडौंया ग्वाहालि

नेवा: अनलाइन न्युज – ललेन्द्र शाक्य | २०७६ चैत्र ११, मंगलबार ०८:४०:४१

सरकारं पलिस्था याःगु कोरोना रोकथाम, नियन्त्रण व उपचार कोषय् राष्ट्रपति विद्यादेवी भण्डारीं निगू महिनाया तलब बिइगु घोषणा यानाः देस व जनताया नितिं च्वछायेबहःगु पलाः ल्ह्वंगु दु ।

राष्ट्रपति ज्याकुथिं म्हिगः सोमवाः विज्ञप्ति सार्वजनिक यानाः राष्ट्रपति भण्डारीं निगू महिनाया पारिश्रमिक बिइगु घोषणा याःगु जानकारी ब्यूगु खः ।

अथेहे, उपराष्ट्रपति नन्दबहादुर पुनं नं च्वछायेबहःगु पलाः ल्ह्वसें राहत कोषय् थःगु छगू महिनाया तलब बिइगु घोषणा याःगु दु । सोमवाः छगू प्रेस नोट जारी यानाः उपराष्ट्रपति पुनं थुज्वःगु घोषणा याःगु खः ।

उगु कोषय् थीथी व्यक्ति व संघसंस्थां स्वेच्छिक रुपं रकम मुंकाच्वंगु दु । भातभतेनी सुपरमार्केटया नाय: मिनबहादुर गुरुङं उगु कोषय् १ करोड तका दां मुंकेगु घोषणा याःगु दु । गुरुङं मुलुक मछिंगु अवस्थाय् लाःगु इलय् सरकार व नागरिकयात ग्वाहालि यायेगु थःगु दायित्व जूगु धासें उगु कोषय् १ करोड मुंकेगु प्रतिबद्धता प्वंकूगु खः ।

सभामुख अग्निप्रसाद सापकोटां कोरोना संक्रमणया महामारीविरुद्ध ल्वायेत सरकारं नीस्वंगु केन्द्रीय राहत कोषय् थःगु छगू महिनाया पारिश्रमिक मुंकूगु दु ।

उगु कोषय् गायक प्रकाश सपूतं २ लख तका दां ग्वाहालि याःगु दु । गायक सपूतं सरकारतक थ्यंकाबिइत धासें पत्रकार महासंघ बागलुङया नायः दिल शिरिषयात २ लख तका दां बराबरया चेक लःल्हाःगु खः ।
कोषय् प्रधानमन्त्रीया सचिवालय टीमय् दुपिं दुजःपिन्सं नं ग्वाहालि याइगु जूगु दु ।

उगु कोषय् प्रधानमन्त्री केपी शर्मा ओलीया मू राजनीतिक सल्लाहकार विष्णु रिमाल, परराष्ट्र मामिला सल्लाहकार डा. राजन भट्टराई, प्रेस सल्लाहकार सूर्य थापा, आर्थिक मामिला सल्लाहकार लालशंकर घिमिरे, प्रमुख स्वकीय सचिव इन्द्र भण्डारी व स्वकीय सचिव राजेश बज्राचार्यं छगू महिनाया तलब ग्वाहालि याइगु जूगु दु ।

अथेहे, उगु कोषय् विकास व पूर्वाधार विज्ञ गजेन्द्र थपलिया, संचार विज्ञ रामशरण बजगाईँ व स्वकीय सचिव होमबहादुर थापां धाःसा बागू महिनाया तलब बिइगु जूगु दु ।

निर्माण व्यवसाय विकास परिषदं कोरोना भाइरस संक्रमण रोकथाम, नियन्त्रण व उपचार कोषय् १ करोड तका दां मुंकीगु जूगु दु ।

भौतिक पूर्वाधार व यातायात मन्त्रालय अन्तर्गत दूगु परिषदं चैत्र ५ गते च्वंगु बैठकं १ करोड तका दां ग्वाहालि कथं कोरोना भाइरस संक्रमण रोकथाम नियन्त्रण व उपचार कोषय् मुंकेगु निर्णय याःगु खः ।

नेपाल बैंक लिमिटेडं उगु कोषय् १ करोड तका दां बिइगु घोषणा याःगु दु । संस्थागत सामाजिक उत्तरदायित्व अन्तर्गत १ करोड तका दां बिइगु निर्णय यानागु बैंकं जानकारी ब्यूगु दु ।

अथेहे, नर्भिक बसन्त चौधरी फाउन्डेसनं नं सरकारया उगु कोषयात १ करोड तका ग्वाहालि कथं ५० लख नगद व ५० लख हलंज्वलं उपलब्ध याकेगु घोषणा याःगु दु ।

प्रधानमन्त्री व मन्त्रिपरिषद ज्याकुथिं सुचं जारी यासें हलिंन्यंकं महामारीया रुपं ब्वलंगु कोरोना भाइरस कोभिड १९ या संक्रमण ब्वलंके मबिइत व उकिया रोकथाम व नियन्त्रणया नितिं मंदुपिं व्यक्ति व संघसंस्थायात राष्ट्रिय वाणिज्य बैंकय् चायेकातःगु खाताय् दां मुंकेत इनाप याःगु दु ।

सरकारं सिंहदरबारय् चायेकूगु खाता नम्बर १९६०००००११०१ खः । मन्त्रिपरिषदया आइतवाः च्वंगु बैठकं उगु कोष चायेकेगु निर्णय याःगु खः । उगु कोषय् मन्त्रीपिन्सं छगू छगू महिनाया तलब बराबरया दां तयेगु निर्णय यायेधुंकूगु दु ।

Categorized in राजनीति