ad 2076 5 18

कोथुननी ल्यंकेत गुथि संस्थानय् घेराऊ छाय् ?

नेवा: अनलाइन न्युज | २०७६ भाद्र २, सोमबार १७:५३:३७

येँया नांजाःगु थाय् असं कोथुननी ल्यंकेगु नितिं थ्वहे वइगु भाद्र ८ गते सुथसिया ११ ता इलय् असनय् मुनाः गुथि संस्थानया ज्याकू त्रिपुरेश्वरय् घेरे यायेगु ज्याझ्वः तःगु दु ।

असं कोथुननी बचाऊ अभियानं थथे गुथि संस्थानय् घेराऊ बिइमाःगु न्हयता खँ न्ह्यथंसें जनताया दथुइ छगू अपील जारी याःगु दु ।

गुथि संस्थान घेराऊ छाय् ? थ्व खँयात अपीलय् थुकथं न्ह्यथनातःगु दु ।

१) असं कोथुननीइ च्वंगु अशोकबृक्ष विहार न्हंकाः विजनेश कम्प्लेक्स दयेकेगु नितिं गुथि संस्थानं भूमिफियानाप याःगु सम्झौता खारेज यायेत ।

२) न्यासः दँ पुलांगु अशोकवृक्ष विहार दुने अमिताभ बुद्धया मूर्ति गुथि संस्थानं सी हे मस्यू धकाः सांस्कृतिक विहारया अस्तित्वयात न्हंका छ्वयेगु, सम्पदाप्रतिया गुथि संस्थानया गैरजिम्मेवारी प्रवृत्तियात हत्तोत्साहित यायेत ।

३) सम्पदाथें जाःगु समुदायया म्हसीका, भावना व आस्था स्वानाच्वंगु विषयस गुथि संस्थानं याःगु मिलेमतोय् भूमाफिया द्वाहां वयेत स्वःगुलिं उकियात खारेज यायेत ।

४) नापीया फिल्डबूकय् सन्तान दरसन्तानं बाः पुतले च्वनेदइ धकाः न्ह्यथनातःसां विहारया सतक खण्डय् विधि व परम्पराया आवश्यक हलंज्वलं तयाः विहारया संरक्षण यानाच्वंपिं १४ परिवारयात जुइत्यंगु अन्यायया विरोध यायेत ।

५) सम्पदाह्यःमि अभियन्तापिनिगु विरोध जुयाच्वंसां नं भूमाफियालिसे मिलेजुयाः थँबहीया भगवानबहाःया पलेस्वां पुखू न्हंकाः छायाँदेवी कम्प्लेक्स दयेकूगु निरन्तर विरोध यासें असं कोथुननी अशोकवृक्ष विहारयात नं छायाँदेवी कम्प्लेक्सथें दयेके मबिइत ।

६) असनय् दूगु कोथुननी गुथि संस्थानया स्वामित्वय् दूगु व अथेहे, मेमेगु सम्पदास्थल नं याकनं सम्पदामैत्री कथं पुनःनिर्माण यायेत व थुकिया म्हालासाला उगु हे समुदायपाखें याकेगु ग्यारेन्टी बिइकेत ।

७) नेपाःया हे सांस्कृतिक व वाणिज्य व्यापार न्ह्याकूगु असंथें जाःगु गौरव लागा न्हंकेत भूमाफियात सफल जुल धाःसा मेमेथाय् च्वंगु सम्पदा झन् तःधंगु खतराय् लाइगु ध्वाथुइकाः जनसचेतना ब्वलंकाः जिम्मेवारी निकाययात थ्व खँय् जोडदारी खबरदारी यायेत व कोथुननी ल्यंकाः तयेगु नितिं झिंन्याद्वः जनतां याःगु ल्हाःचिं गुथि संस्थानयात लःल्हायेगु ।

Categorized in राजनीति