telecom 18 kartik 2076

कीर्तिपुर मेयर कप खेलकुद भाद्र ७ गते शनिवाःनिसें न्ह्याइगु

नेवा: अनलाइन न्युज – ललेन्द्र शाक्य | २०७६ भाद्र ५, बिहिबार १३:४५:१७

किपू नगरपालिकां मेयर कप खेलकुद भाद्र ७ गते शनिवाःनिसें न्ह्याकीगु जूगु दु ।

ग्वसाः खलः नगरपालिकां कीर्तिपुर मेयर कप खेलकुद ज्याझ्वः विषयस म्हिगः बुधवाः छगू पत्रकार सम्मेलन यानाः जानकारी ब्यूगु खः । नगरपालिकाय् जननिर्वाचित प्रतिनिधिपिं वयेधुंकाः मेयर कप खेलकुद वंगु दँनिसें न्ह्याकूगु खः ।

उगु पत्रकार सम्मेलनय् किपूया थीथी कासामिपिन्त खेलकुदया थीथी विधाय् ‘आइडल टीम’ दयेकेगु आज्जुं मेयर कप खेलकुद ग्वसाः ग्वयागु जानकारी किपू नगरपालिकाया मेयर रमेश महर्जनं जानकारी ब्यूगु दु ।

उगु पत्रकार सम्मेलनय् छगू प्रेस विज्ञप्ति नं सार्वजनिक याःगु खः । सार्वजनिक याःगु विज्ञप्तिइ थुगु दँ ग्वसाः ग्वःगु कीर्तिपुर मेयर कप खेलकुदय् टेबुल टेनिस, फुटसल, भलिबल, चेस व ब्याडमिन्टन कासा दुथ्याकुगु खँ न्ह्यथनातःगु दु ।

 

अथेहे, उगु विज्ञप्तिइ मेयर कप क्वचायेकेगु नितिं मुक्कं बजेट ८ लख ट० हजार तका दां खर्च जुइगु अनुमान दूगु खँया जानकारी नं बियातःगु दु ।

किपू नगरपालिकां कीर्तिपुर मेयर कप खेलकुदया नितिं भलिबल कासाय् राजकुमार महर्जन व राजन महर्जनपिन्त संयोजक कथं ल्यःगु दु । अथेहे, टेबुल टेनिस कासाया नितिं प्रशान्त महर्जन, ब्याडमिन्टनया नितिं ओममुन िबज्राचार्य, चेस कासाया नितिं ज्ञानेन्द्र महर्जन व फुटसलया नितिं इचि महर्जनपिन्त संयोजक ल्यःगु दु ।

बुधवाः जूगु पत्रकार सम्मेलनय् कीपू नगरपालिकाया उपप्रमुख सरस्वती खड्का रिजाललिसें कीर्तिपुर मेयर कप कासाया संयोजक अनुज प्रधान नं उपस्थित जूगु खः ।

Categorized in कासा