nepal investment baink

किपू नपाया मेयर जापानय्, कार्यबाहक मेयर १ वडाया नायः हर्ष महर्जन

नेवा: अनलाइन न्युज – ललेन्द्र शाक्य | २०७६ आश्विन ९, बिहिबार ११:२२:४७

उपमेयर सरस्वती खड्का रिजाल चीनय्, योजना विकास विभागया प्रमुख अनुज प्रधान स्वीडेनय्

ऐतिहासिक नगर किपू नगरपालिकाया मेयर रमेश महर्जन निम्ह डाक्टरपिं ज्वनाः जापान भ्रमणय् वंगु दुसा उपमेयर सरस्वती खड्का रिजाल चीन भ्रमणय् वंगु दु ।

अथेहे, किपू नगरपालिकाया योजना विकास विभागया प्रमुख अनुज प्रधान नं स्वीडेन भ्रमणय् वंगु दु ।

वंगु सोमवाः किपू नगरपालिकाया मेयर रमेश महर्जनं थः जापान भ्रमणय् वनेत्यंगुलिं थःगु अनुपस्थितिइ कार्यबाहक रुपं ज्या यायेगु नितिं कार्यबाहक मेयरया रुपं किपू नगरपालिका १ वडाया वडाध्यक्ष लिसें नगरपालिकाया फोहरमैला व्यवस्थापन विभाग प्रमुख हर्ष महर्जनयात भाला बियाः जापान थ्यंकूगु दु ।

नगरपालिका स्रोतं ब्यूगु जानकारी कथं मेयर रमेश महर्जन जापान भ्रमण क्वचायेकाः चीन भ्रमणय् वनीगु जूगु दुसा चीन भ्रमणय् वनाच्वंम्ह उपमेयर सरस्वती खड्का रिजाललिसे नापंतुं नेपाः लिहाँ वइगु जूगु दु । मेयर व उपमेयरया जापान व चीन भ्रमण हप्ता दिनया नितिं खः धकाः कार्यवाहक मेयर हर्ष महर्जनं जानकारी ब्यूगु दु ।

अथेहे, योजना विकास विभाग प्रमुख अनुज प्रधानया स्वीडेन भ्रमण भच्चा ताःहाकः हे जुइगु जुानकारी किपू नगरपालिका २ वडाया वडाध्यक्ष लिसें नगरपालिकाया संस्कृति पर्यटन व सम्पदा विभाग प्रमुख रमेशमान डंगोलं नेवाः अनलाईनन्यूजयात जानकारी ब्यूगु दु ।

Categorized in स्थानिय-समाज