telecom 18 kartik 2076

किपू नगरपालिका व चन्द्रागिरी नगरपालिका दुने अप्पा भट्टात चीकीगु

नेवा: अनलाइन न्युज – ललेन्द्र शाक्य | २०७६ कार्तिक २६, मंगलबार ११:५४:२६

किपू नगरपालिका व चन्द्रागिरी नगरपालिका दुने न्ह्याकाच्वंगु अप्पा भट्टा चीकीगु जूगु दु ।

अप्पा भट्टां पिहाँ वइगु कुं यानां लकस (वातावरण) दुषित जुयाच्वंगु लिसें स्वास्थ्यय् तकं नकारात्मक लिच्वः लानाच्वंगुलिं उगु भट्टा चीकेगु निर्णय याःगु खः ।

छुं न्हि न्ह्यःनिसें उगु भट्टात चीकेत माग यासें स्थानीय बासिन्दां संघर्ष समिति दयेकाः आन्दोलित जुयाच्वंगु खः ।

स्थानीय बासिन्दापिं आन्दोलित जूगुलिं छुं अप्रिय घटना मजुइमा धकाः येँ जिल्ला प्रशासन ज्याकुथिं बिहिवाः सर्बदलीय मुँज्या तया थ्व खँ क्वःछ्यूगु खः ।

येँ जिल्ला प्रशासक सिडिओ जनकराज दाहालया हे कुतलय् थ्व सर्वदलीय मुँज्या च्वंगु खः । येँ जिल्ला प्रशासन ज्याकू बबरमहलय् च्वंगु मुँज्याय् संघर्ष समितिया पदाधिकारीतलिसें सर्वसाधारण जनतातय्सं ब्वति काःगु खःसा भट्टा व्यवसायी, चन्द्रागिरी नगरपालिकाया मेयर घनश्याम गिरी, किपू नगरपालिकाया मेयर रमेश महर्जन, नगरपालिकाया वडाध्यक्षलिसें उद्योग मन्त्रालयया वातावरण विभागया पदाधिकारीपिनिगु नं ब्वति दुगु खः ।

संघर्ष समितिया पदाधिकारीपिन्सं स्वास्थ्य प्रतिकूल लिच्वः लाःगुलिं गुगु नं हालतय् अनं भट्टा चीकेमाःगु माग याःगु खःसा भट्टा व्यवसायीतय्सं उद्योग मन्त्रालयस आधिकारिक रुपं दर्ता यानाः न्ह्याकाच्वंगु उद्योग खारेज मयायेत इनाप याःगु खः । बरु वातारणीय लिच्वः लाःसां उकीयात निश्चित मापडण्ड दुने च्वना ज्या याकेत इनाप याःगु खःसा न्हून्हूगु प्रविधि वयाच्वंगुलिं उकीयात नालाः वातावरण लिसें स्वास्थ्यय् नं म्हो जक लिच्वः लाइकथं ज्या याकेत इनाप याःगु खः ।

उद्योग विस्थापन याना देय्यात समृद्धि जुइमखु धासें थःपिनिगु यक्व हे लगानी लानाच्वंगुलिं नं उद्योग चलेयाके बीमाःगु माग याःगु खः ।

चन्द्रागिरी नगरपालिकाया मेयर घनश्याम गिरीं नगरपालिकाया बोर्डं मुक्कं भट्टा चीकेगु निर्णय यानाः तयेधुनागु जूगुलिं नगरपालिकाया निर्णय हे अन्तिम निर्णय खः धासें जनताया चाहना कथं थःपिं जनप्रतिनिधिपिं जुइमाःगुलिं नं भट्टा अनं चीके हे माःगु न्ह्यथनादिल । बरु भट्टा चीकेत छुं ई माःसा प्रक्रियागत रुपं निश्चित ईया दुने चीकेत उजं बियादिल ।

किपू नगरपालिकाया मेयर रमेश महर्जनं किपू नगरपालिकां न्हापाया जनप्रतिनिधिया इलय् हे नगरपालिका दुने भट्टात मतयेगु निर्णय यानातःगु लुमंकादिसें स्वनिगलय् अप्पा–भट्टा तये हे मज्यूगु बिचाः तयादिल । मेयर महर्जनं चन्द्रागिरी नगरपालिकाय् चलेयानाच्वंगु आपालं भट्टातय्सं किपू नगरपालिकाय् च्वंगु जग्गाया चा ल्ह्ययाच्वंगुलिं व ज्यायात न्हापा हे प्रतिबन्ध तयातयागु खँया जानकारी नं ब्यूगु खः ।

जिल्ला प्रशासक सिडिओ जनकराज दाहालं निश्चित प्रक्रिया पूवंकाः जक भट्टा चीकेमाःगु जूगुलिं सर्वपक्षीय समिति दयेकाः उगु समितिया प्रतिवेदनकथं निश्चित ईया दुने भट्टात चीकेत उजं बिसें वय्कलं उगु सर्वपक्षीय समिति दयेकेत उजं बियादीगु दु ।

–ज्ञानकुमार महर्जन, किपू–३

Categorized in स्थानिय-समाज