chetrapa55

किपूया न्हूप्रतिभा गायक भुवन महर्जनया म्ये शुक्रवाः पिदनीगु

नेवा: अनलाइन न्युज – ललेन्द्र शाक्य | २०७६ श्रावण २३, बिहिबार १५:५४:५०

नेवाः एफएम १०६.७ मेगाहर्जय् श्रावण २४ गते शुक्रवाः सुथय् ८ ता इलय् सार्वजनिक जुइगु

किपूया न्हूप्रतिभा गायक भुवन महर्जनया म्ये श्रावण २४ गते शुक्रवाः सुथय् ८ ता इलय् नेवाः एफएम १०६.७ मेगाहर्जपाखें प्रिमियर कथं सार्वजनिक जुइगु जूगु दु ।

भुवन महर्जनं बिस्कं पहःया नेपालभाषाया मचा म्ये हालादीगु खः । “मचा छम्ह चीधि तुतु नये धाइ...” बोलया थुगु मचाम्ये गायक भुवन महर्जनं हे च्वयादीगु खःसा वय्कलं हे लसय् हनादीगु खः ।

नांजाःम्ह संगीत संयोजक जीवित जल्मीं संगीत संयोजन यानादीगु थुगु म्ये छेत्रपातिया सूर मेलोडी रेकर्डिङ्ग स्टुडियोस रिकर्ड जूगु खःसा थुगु म्येय् संगीतकःमि सुरेन्द्र श्रेष्ठं रिकडिङ्ग व मिक्सिङ्ग यानादीगु दु ।

थुगु मचा म्ये भुवन महर्जनं थः नकतिनि जन्म जूम्ह काय् लुमंकाः च्वयागु म्ये खः धकाः नं धयादीगु दुसा न्हूप्रतिभा म्येहालामि भुवन महर्जनया थ्व म्ये दकले न्हापांगु रिकर्डेड म्ये खःसा आः याकनं हे भिजिट नेपाल २०२० या नितिं किपूया विषय दुथ्याःगु म्ये रिकर्ड यायेगु जानकारी नं भुवन महर्जनं बियादीगु दु ।

नेवाः एफएम १०६.७ मेगाहर्जं श्रावण २४ गते शुक्रवाः सुथसिया ८ ता इलय् प्रिमियर कथं प्रसारण जुइत्यंगु थःगु म्ये न्यनेत न्हूप्रतिभा म्येहालामि भुवन महर्जनं सकलसित इनाप यानादीगु दु ।

Categorized in कला