किपूया क्वाःरय् धाःबाजा व लाखेप्याखं प्रशिक्षण क्वचाल
नेवा: अनलाइन न्युज – ललेन्द्र शाक्य | २०७६ आषाढ ३०, सोमबार १५:५५:५७
गुरुपिं किपूया परम्परागत युवा संगीतकःमिपिं
किपूया परम्परागत बाजाय् पोख्तपिं धाःबाजा गुरुपिं कविन महर्जन, राजन महर्जन, लाखेगुरु राजकुमार महर्जनलिसेंया युवा संगीतकःमि व प्याखं हुलामिपिं जानाः किपू नगरपालिका ६ वडाया क्वाःरय् धाःबाजं प्रशिक्षण बियादीगु खः । अथेहे, उगु धाःबाजा व लाखे प्याखं प्रशिक्षण ज्याझ्वलय् किपूया सुनिल महर्जनं नं ग्वाहालि यानादीगु खः ।
क्वाःर ल्यायम्ह पुचःया १४ म्ह प्रशिक्षार्थीपिन्सं प्रशिक्षण काःगु उगु धाःबाजा व लाखे प्याखं प्रशिक्षण ज्याझ्वः क्वचाःगु दु ।
अथेहे, धाःबाजाया लिसेलिसें क्वाःर ल्यायम्ह पुचः दुने लाखेप्याखंया प्रशिक्षण नं ब्यूगु खः, लाखेप्याखं प्रशिक्षण सनस्टार क्लबया हे बांलाक्क लाखे प्याखं ल्हुइम्ह प्याखंम्वःपाखें प्रशिक्षण बिइगु ज्याझ्वः जूगु खः ।
उकथं धाःबाजा व लाखेप्याखं प्रशिक्षण सुथांलाक्क क्वचायेकाः नापंतुं पिथनेगु ज्या जूगु खः ।
परम्परागत रुपं नासःद्यः साला न्ह्याकूगु उगु धाःबाजा प्रशिक्षण पूवंकाः असार २९ गते आइतवाः विधिवत् रुपं पिथंगु दु ।
सुथांलाक्क धाःबाजा व लाखे प्याखं प्रशिक्षण बियादीगुलिं धाःबाजा गुरुपिं व लाखे प्याखं गुरुपिन्त किपूया ६ वडाया क्वाःर ल्यायम्ह पुचःपाखें सम्मान कथं मतिनाया चिं नं लःल्हाःगु खः ।
धाःबाजा गुरु कविन महर्जनं धाःबाजा व लाखे प्याखं प्रशिक्षणयात कयाः धयादी, “२५ न्हुतक मद्दिक्क प्रशिक्षण बियागु खः । सयेकूपिं प्रशिक्षार्थीपिन्सं अनुशासनय् च्वनाः बाजं व लाखे प्याखं सयेकूगु दु । आः वय्कःपिन्सं बांलाक्क हे बाजं थायेसःगु दुसा लाखे प्याखं नं बांलाक्क हे हुले सयेकूगु दु ।”
