ad 2076 5 18

किपुुली इसासया ‘ईन्द्रेणी साँझ’, क्वचाल झःझः धायेक

नेवा: अनलाइन न्युज – ललेन्द्र शाक्य | २०७६ भाद्र १, आइतबार १६:०१:१८

जन नृत्यगुरु हरिकृष्ण दर्शनधारीया ७ क्वःगु वार्षिक स्मृतिइ ईन्द्रेणी सांस्कृतिक समाज –इसास) किपूपाखें तःजिगु सांगितिक व सांस्कृतिक ज्याझ्वःया ग्वसाः ग्वःगु दु ।

ईन्द्रेणी साँझ नां बियाः म्हिगः श्रावण ३२ गते शनिवाः किपूया बाघभैरव प्रजा दबुलिइ उगु ज्याझ्वः जूगु खः ।

नेपाल नाट्य तथा संगीत प्रज्ञा प्रतिष्ठानया कुलपति नारायणभक्त श्रेष्ठ (रायन) मुमाहाँ कथं झाःगु उगु ज्याझ्वलय् किपू नगरपालिकाया मेयर रमेश महर्जन विशेष पाहाँ कथं झाःगु खः ।

ज्याझ्वलय् इसास किपूया सिडि म्येचाः ‘स्मृतिका स्वरहरु’ नं सार्वजनिक याःगु खः ।

उगु ज्याझ्वलय् पाहाँ कथं झाःम्ह जन संगीतकःमि वदन शर्मा राजोपाध्यायं सार्वजनिक जूगु म्येचाः ‘स्मृतिका स्वरहरु’ दुनेया म्येया विषयस कुलादीगु खः ।

नांजाःपिं प्रगतिशील संगीतकःमिपिं वीरप्रसाद भन्सारी व गुज्ये मालाकारलिसें इसास किपूया सकल जः दुजःपिनिगु सक्रियतां उगु ज्याझ्वः सुथांलाक्क न्ह्याःगु खःसा ज्याझ्वलय् नांजाःपिं म्येहालामिपिं सतीश महर्जन, मथुरा महर्जन, रीता महर्जन, रत्नशोभा महर्जन, वीरप्रसाद भन्सारी, गुज्ये मालाकार, रानीशोभा महर्जनलिसें मीना महर्जन, प्रमिला महर्जन, वीरमाया महर्जन, मचा म्येहालामि रफेला महर्जन व न्हूप्रतिभा म्येहालामि भुवन महर्जन इत्यादी म्येहालामिपिन्सं म्ये हालाः न्यंकादीगु खः ।

उगु ज्याझ्वलय् मंगल स्कूलया हुलाप्याखं लिसें यलया सुनागुथिया बुदोकैदो कराँते कासाया लूत नं न्ह्यब्वःगु खः । अथेहे, कुमारी प्याखंलिसें नांजाःम्ह प्याखं हुलामि शिलकुमारी महर्जनया मञ्जुश्री हुलाप्याखं, नेवाः हुलाप्याखंलिसें थीथी हुलाप्याखं नं न्ह्यब्वःगु खः ।

मूपाहाँ रायन श्रेष्ठपाखें सहभागी सकल कलाकारपिन्त हनापौ व मतिनाया चिं लःल्हानाः सम्मान नं यानादीगु खः ।

ज्याझ्वः इसासया रेखा भन्सारी श्रेष्ठं न्ह्याकादीगु खः ।

Categorized in कला