nepal lifef 2076 8 8

किपुली नं १३ क्वःगु साउथ एसियन कासा उलेज्या

नेवा: अनलाइन न्युज – ललेन्द्र शाक्य | २०७६ मङ्सिर १५, आइतबार १३:४०:१५

१३ क्वःगु साउथ एसियन कासा (साग)या उलेज्या थौं मंसीर १५ गते आइतवाः किपुली नं उलेज्या जूगु दु ।

युवा व खेलकुद मन्त्री जगतबहादुर विश्वकर्माया मूपाहाँसुइ उलेज्या जूगु उगु ज्याझ्वलय् किपू नगरपालिकाया मेयर रमेश महर्जन, उपमेयर सरस्वती खड्कालिलिसें किपूया १ वडाया वडाध्यक्ष हर्ष महर्जन, ३ वडाया वडाध्यक्ष राजेन्द्र महर्जन, ९ या वडाध्यक्ष गंगाराम महर्जन, १० या वडाध्यक्ष अमन महर्जन, १ वडाया वडा दुजः धनबहादुर महर्जनलिसें १० वडाया वडा दुजः व थीथी ख्यःया प्रतिनिधिपिनिगु उपस्थिति दूगु खः ।

उलेज्या ज्याझ्वलय् खोखो संघया पदाधिकारीपिं, खेलकुद परिषद, ओलम्पिक कमिटीया दुजःपिं लिसें थीथी देसया कासा ख्यःया प्रतिनिधिपिनिगु उपस्थिति दूगु खः ।

राष्ट्रिय खोखो संघया केन्द्रीय न्वकू लिसें कीर्तिपुर खेलकुद समाजया नायः प्रदीप महर्जनया संयोजनय् किपूया खेलकुद मैदानय् अन्तर्राष्ट्रिय कासा सागया थीथी कासा जुइत्यंगु खः ।

किपूया १० वडा न्हूबजाः किपू ध्वाखाय् च्वंगु खेलकुद मैदानय् जूगु उगु साग कासाया उलेज्या ज्याझ्वलय् किपूया समाजसेवी प्रा.डा. शिवशरण महर्जन, पुष्पसदन स्कूलया प्रिन्सिपल उमेश श्रेष्ठया लिसेलिसें किपूया थीथी ख्यःया प्रतिष्ठित व्यक्तित्वपिनिगु नं उपस्थिति दूगु खः ।

किपूया उगु खेलकुद मैदानय् साग कासाया खोखो कासा, तरवार कासा, कबर्दी कासा जुइगु जानकारी ब्यूगु दुसा किपूया क्रिकेट मैदानय् क्रिकेट कासा जुइगु जानकारी नं ब्यूगु दु । थ्व ल्याखं किपुली साउथ एसियन कासा (साग)या प्यंगू विधाया कासा जुइगु जूगु दु ।

(थन क्लीक यानाः भिडियो स्वयादिसँ)

उलेज्या कासाय् नेपाःलिसें बंगलादेश, श्रीलंकाः, भारतया कासामिपिनिगु उपस्थिति दूगु खःसा थौं उलेज्या धुंकाः खोखो कासाया निगू कासा जुइगु जानकारी ब्यूगु दु ।

उलेज्या ज्याझ्वलय् किपू नगरपालिका १० वडा म्वानःत्वाःया दाफा बाँसुरी खलःया संगीतकःमिपिन्सं सांगितिक बाजं न्ह्यब्वःगु खः ।

Categorized in कासा