telecom 18 kartik 2076

किपुली देवी प्याखं, युवा समुदायं मूर्तरुप बिल

नेवा: अनलाइन न्युज – ललेन्द्र शाक्य | २०७६ आश्विन २७, सोमबार १४:४०:०७

किपूया १० वडा तःननी त्वालं मोहनी नखःया इलय् पिदनीगु देवी प्याखं थुगुसी पिदंगु दु ।

तःननी त्वाःया युवा समुदायपिं जानाः थःपिनिगु त्वाःया शान किपूया गौरव दिनाच्वंगु देवी प्याखंयात हाकन. मूर्तरुप बियाः न्ह्यब्वःगु खः ।

लच्छिं मल्याक प्रशिक्षण बिया मोहनीया चालंकुन्हु किपू देय् चाःहिलाः क्यनेमाःगु थुगु देवी प्याखं अतिकं बांलाक्क व न्ह्याइपुक्क किपू देय् परिक्रमा यानाः क्यंगु खः ।

थ्वहे झ्वलय् म्हिगः आइतवाः अमाःसि पुन्हीया दिं किपू नगरपालिका १० वडाया तःननी त्वालय् हे उगु देवी प्याखं क्यंगु खः । अमाःसिपुन्हीया दिं खय्तला १० वडाया हे चिलंच्वय् क्यनेमाःगु खः । तर, चिलंच्वय् मक्यंसे थःपिनिगु हे त्वालय् उगु प्याखं म्हिगः आइतवाः न्हिनसिया ३ ता इलंनिसें बहनीतक क्यंगु खः ।

थुकिया विषयस तःननी त्वाःया स्थानीय बासिन्दापिन्सं धाःगु दु, “थुगु देवी प्याखं विधिवत् रुपं तान्त्रिक विद्यापाखें पूजाविधि पूवंकाः क्यनेमाःगु शक्तिं जाःगु प्याखं खः । थुगु प्याखंया तान्त्रिक विद्या गुरु चिलंच्वया गुरुजु खः । अमाःसि पुन्हीया दिं थुगु प्याखं चिलंच्वय् क्यनेमाःगु यानातःगु चलन गुरुया सम्मानय् गुरुया छेँ न्ह्यःने क्यनेगु यानातःगु खः । तर आः तःननी त्वालय् हे क्यनेगु यात । वसपोल गुरुजु मदयेधुंकल, अले तान्त्रिक विद्यापाखें प्याखं स्यनीपिं नं मन्त । तःदँ तक थ्व प्याखं दिके नं माल । आः वयाः ल्यायम्हपिं जानाः क्यन ।”

थुगु प्याखनय् भैरव, इन्द्रायणी द्यःपिंलिसें यानाः ख्याः व कवंया नं भूमिका दु । दाफा बाजंया म्ये व थीथी बाजंलिसें प्वंगाःया तालय् ल्हुइगु थुगु देवी प्याखं स्वयेत किपूया बासिन्दा जक मखु, किपू पिनेया आपालं मनूत नं म्हिगः आइतवाः तःननी त्वालय् थ्यंकूगु खःसा तःननी त्वाःया सकल त्वाःबासीं प्याखंयात केपु तकं लःल्हाःगु खः ।

इलय् ब्यलय् आपालं दँ तक दिकेमालाः वयाच्वंगु थुगु देवी प्याखं २०६७ साल माघ महिनाय् जूगु कीर्तिपुर महोत्सवय् नं न्ह्यब्वःगु खः । तर उगु महोत्सवय् प्याखनय् छ्यलीगु द्यःपिनिगु ख्वाःपाः नक्कली दयेकाः हःगु खःसा महोत्सव ज्वःछि उगु हे नक्कली ख्वाःपाः पुयाः प्याखं न्ह्यब्वःगु खः ।

आः किपू १० वडा तःननी त्वाःया देवी प्याखंयात निरन्तरता बिइगु खँय् अनया युवा पुस्ता सक्रिय जूगु दुसा दँय् दसं न्ह्यब्वयेगु प्रतिबद्धता नं प्वंकूगु दु ।

Categorized in नेवाः