ad 2076 5 18

किपुलिइ न्हय्म्ह विशिष्ट ब्यक्तिपिन्त हनीगु

नेवा: अनलाइन न्युज – ललेन्द्र शाक्य | २०७६ भाद्र १, आइतबार १७:०९:०८

उस्ताद गोविन्द किपू फाउण्डेशनं थीथी विधाय् विशेष योगदान यानादीपिं न्हय्म्ह ब्यक्तित्वपिन्त छगू हे दबुलिइ हनीगु जूगु दु ।

वइगु भाद्र ६ गते शुक्रवाः कुन्हु सनिलया ४ बजे किपूया कुतिसाः त्वालय् फाउण्डेशनं छगू ज्याझ्वःयासें हनेत्यंगु खः ।

ख्यालि जुजु मदनकृष्ण श्रेष्ठया मूपाहांसुइ जुइगु उगु ज्याझ्वलय् हना ज्याझ्वः नापं थीथी कलाकारपिन्सं सांस्कृतिक ब्वज्या नं यानादी धाःगु दु ।

उगु ज्याझ्वलय् थनि स्वीन्यादँ न्ह्यःनिसें गितार बादक जुया देशय् नापं विदेशय् तकं थःगु प्रतिभा न्ह्यब्वया वयादीम्ह सुल्तान अफ स्ट्रीङ येँया अनिल शाही, अथेहे थनि स्वीन्यादँ न्ह्यःनिसें नेवाः बाजाया गुरु जुयादीम्ह यलया हरिलाल श्रेष्ठ, थनि नीन्यादँ न्ह्यःनिसें नेपाःया पत्रकारिता ख्यःपाखें समाजय् हिउपाःया नितिं ज्वःमदुगु योगदान यानादीम्ह किपूया पत्रकार श्रीकृष्ण महर्जन, थनि नीन्यादँ न्ह्यःनिसें कलाकार जुया महत्वपूर्ण भूमिका म्हिता वयादीम्ह पांगा किपूया पल्पसा डंगोल, थनि न्यीन्यादँ न्ह्यःनिसें ख्यालि कलाकार जुया समाजय् हिउपाःया नितिं भूमिका म्हतादीम्ह येँया सुरेन्द्र मानन्धर, थनि स्वीन्यादँ न्ह्यःनिसें म्ये हालादीम्ह गोविन्द उस्तादया शिष्य किपूया राजु महर्जन व थनि नीनिदँ न्ह्यःनिसें बासुरी बादन ख्यलय् तःधंगु भूमिका म्हितादीम्ह येँया विनय महर्जनयात हनेज्या यायेत्यंगु खः ।

उगु ज्याझ्वलय् कुतिसाः त्वाःया ज्याथःजिथिपिन्त हनेज्या नापनापं सांस्कृतिक ब्वज्या नं जुइ धकाः उस्ताद गोविन्द किपू पाmउण्डेशनया नायः दिलिप किपू महर्जनं जानकारी बियादीगु दु ।

ज्याझ्वलय् प्रदेश नम्बर ३ या सांसद पुकार महर्जन नं पाहाँ कथं सहभागी जुयादी धाःगु दु । अथेहे किपूया हनेबहःपिं ब्यक्तित्वपिन्त नं पाहाँ कथं ब्वनातयागु जानकारी वय्कलं बियादीगु दु ।

Categorized in कला