ad 2076 5 18

कासाय् मिलेमतो याःपिन्त कारवाही यायेगु तयारी

नेवा: अनलाइन न्युज | २०७६ भाद्र १६, सोमबार १४:५२:४४

सरकारं कासाय् मिलेमतो (म्याच फिक्सिङ) याःपिं कासामि व कासामिपिनत ग्वाहालि याःपिं मनूतय्त कारवाहीया दायराय् हयेगु कथं न्हूगु विधेयक संसदय् न्ह्यब्वःगु दु ।

मिलेमतो जूगु प्रमाणित जूसां स्वदँ कैद व स्वीद्वः तका दां जरिवानाया लिसें रकमतकं कालबिल याःगु जूसा उगु रकम नं जफत यायेगु विधेयकय् न्ह्यथनातःगु दु ।

युवा व खेलकुद मन्त्रालयं हःगु ‘खेलकुद विकास सम्बन्धय् व्यवस्था यायेत दयेकुगु विधेयक’य् उगु प्रावधान तयातःगु दु ।

प्रतिनिधिसभा, शिक्षा व स्वास्थ्य समितिइ आः उगु विधेयक सहलहया झ्वलय् दु । विधेयकयात कयाः १२ म्ह सांसदपिन्सं थःथःगु संशोधन प्रस्ताव न्ह्यब्वःगु दु ।

उगु विधेयकय् न्ह्यथनातःगु दु, ‘नेपाः दुने, नेपाःया प्रतिनिधित्व यानाः विदेशी मुलुकय् सुं कासामिलिसे प्रतिस्पर्धा यायबलय् छुं कासालिसे सम्बद्ध कासामि वा पदाधिकारीं उज्वःगु कासाया प्रतिस्पर्धा याइबलय् वइगु स्वाभाविक परिणाम प्रतिकूल जुइगु कथं सुं कासामि वा कासामिया पुचःलिसे मिलेमतो यायेत वा सुयागुं प्रलोभनय् लायेत वा छुं बाजी यानाः त्याकेगु वा बुकेगु कथं उज्वःगु कासा म्हितेत व म्हितकेगु ज्या यायेमज्यू ।’

मिलेमतोया नितिं उक्सेयाइम्ह वा ग्वाहालि याइम्ह मनूयात तकं उगु कारवाहीया दायराय् हयेफइगु विधेयकय् व्यवस्था दु ।

आः उगु विधेयक राष्ट्रियसभापाखें पारित जुयाः प्रतिनिधिसभाय् थ्यंकूगु दु । विधेयकया उगु प्रावधानय् सांसद विमला विश्वकर्मा व आशाकुमारी विक नं संशोधन प्रस्ताव न्ह्यब्वःसें कासाय् मिलेमतो याइपिन्त ५ लखतक जरिवाना व हदैतकया कारवाही यायेमाःगु प्रावधान तयेमाःगु माग याःगु दु ।

सांसद विमला विश्वकर्मां धाःगु दु, “कासामि उत्पादन यायेत राज्यया लगानी आपालं जुइ । राष्ट्रिय व अन्तर्राष्ट्रिय खेलकुद कासाय् ब्वति काइपिं कासामिपिन्सं मिलेमतो याये दइमखु ।”

विधेयकयात कयाः संशोधन तःम्ह सांसद दीव्यमणि राजभण्डारीं नेपाःया कासा प्रतिष्ठायात च्वय् तयेत राजनीतिक लिच्वःपाखें मुक्त यायेमाःगु, खेलकुद परिषदया विकल्पय् प्राधिकरण व सदस्यसचिवया पलेसा कार्यकारी निर्देशकया प्रावधान तयेत आवश्यक जू धकाः धाःगु दु ।

संशोधनकर्ता सांसद जीवनराम श्रेष्ठं खेलकुद परिषदया ज्याय् व्यापक सुधार यानाः खेलकुदया पुनःसंरचना यायेमाःगु आवश्यकता दूगु खँय् बः ब्यूगु दु ।

विधेयकय् राष्ट्रिय, प्रदेश व स्थानीय स्तरया कासा संघ नीस्वनेफइगु जूसां नं छगू कासाया नितिं छगू सिबें अप्वः संघ नीस्वने मफइगु, छम्ह व्यक्ति मदिक्क निगु कार्यकाल सिबें अप्वः अवधिया निति. कासा संघया नायः, महासचिव वा सचिव पदय् निर्वाचित वा मनोनित जुइमफइगु, खेदकुद परिषदया बहालवाला कर्मचारी, प्रशिक्षक नं कासा संघय आवद्ध जुइमदइगुथें जाःगु प्रावधान नं विधेयकय् दु ।

Categorized in कासा