chetrapa55

कश्मिरय् कर्फ्युः नेतापिन्त नजरबन्द, मोबाइल व इन्टरनेटय् प्रतिबन्ध

नेवा: अनलाइन न्युज | २०७६ श्रावण २०, सोमबार १२:२९:०६

भारत प्रशासित काश्मिरय् विपक्षी मुस्लिम नेतापिन्त नजरबन्दय् तयाः सरकारं इन्टरनेट व मोबाइल टेलिफोन सेवा तकं बन्द याःगु दु । राजधानी श्रीनगरय् अनिश्चितकालीन कर्फ्यु आदेश जारी याःगु दु ।

श्रीनगरय् सब्बु चान्हय् नेशनल कन्फ्रन्सया नेता उमर अब्दुल्ला, पिडिपी नायः व पूर्व मूख्यमन्त्री मेहबुबा बुफेती व काश्मिर पिपुल्स कन्फरेन्सया नायः सज्जाद लोनयात छेँय् हे नजरबन्द याःगु दु ।

श्रीनगरय् भारतया संविधानया धारा १४४ लागू याःगु दु । उगु धारा लागू जुइधुंकाः मेगु आदेश मवःतले तक उगु क्षेत्रय् मनूतसें वयेवने यायेदइमखु । उगु ई दुने फुक्क शिक्षण संस्थात नं बन्द जुइ ।

सरकारं आपालं शैक्षिक संस्थाया छात्राबास खाली यायेत आदेश ब्यूगु दु । राजधानी श्रीनगरलिसें फुक्क काश्मिर घाटीइ मोबाइल व इन्टरनेट सेवा बन्द जूगु पत्रकार माजिद जहाँगिरयात उदृत यासें बीबीसीं बुखँ च्वःगु दु ।

श्रीनगरपाखें ल्याण्डलाइन फोनय् तकं सम्पर्क कटौती याःगु दु । काश्मिरय् अशान्ति जुइधुंकाः शुक्रवाःनिसें न्ह्याःगु पवित्र हिन्दू तीर्थस्थल अमरनाथ यात्रा रद्द याःगु दु । अमरनाथ गुफा दर्शनया नितिं थ्यंकूपिं द्वलंद्वः भक्तजन व पर्यटकपिन्त तत्काल काश्मिर घाटी त्वःताः वनेत आग्रह याःगु दु ।

थ्वहे झ्वलय् काश्मिरया लिपांगु अवस्थायात कयाः भारतीय प्रधानमन्त्री नरेन्द्र मोदीं सोमवाः सुथय् मन्त्रिपरिषद बैठक सःतूगु खः । उखे पाकिस्तानय् नं संसदीय समिति बैठकय् थुगु विषयस सहलह जूगु दु ।

उखे काश्मिरया लिपांगु अवस्थाप्रति मुस्लिम देसतय्गु संगठन अर्गनाइजेशन अफ इस्लामिक कन्ट्रिज ओआइसीं च्यूताः प्वंकूगु दु ।

ओआइसीं धाःगु दु, “भारतीय कब्जाय् दूगु काश्मिरया अवस्था नाजुक जुयावंगु व अतिरिक्त सुरक्षा बलया तैनाथीया लिसें प्रतिबन्धित क्लष्टर बमया छ्यलाबुलाया खबरं जिमित चिन्तित याःगु दु ।”

काश्मिरय् उग्रपन्थी मुस्लिम संगठनं आक्रमण यायेगु सुचंप्रति प्रशासनं छुं दिं थुखे उच्च सुरक्षा सतर्कता छ्यःगु दु । हिन्दू भक्तजनपिन्त लक्षित यानाः अमरनाथ यात्राया झ्वलय् हिंसा जुइगु सुचं लिपा सरकारं सुरक्षा बल थप याःगु खः ।

पाकिस्तानी प्रधानमन्त्री इमरान खानं काश्मिरय् न्हूगु संकट ब्वलनीगु ख्याच्वः थ्वसिबें न्ह्यः हे बिइधुंकूगु दु । काश्मिरया स्वतन्त्रतायात कयाः भारत व पाकिस्तान दथुइ वंगु ७० दँनिसें लडाइँ न्ह्यानाच्वंगु दु ।

Categorized in अन्तर्राष्ट्रिय