telecom 18 kartik 2076

कलाकार स्वतन्त्र महर्जनया नितिं थौं ‘गुड फ्राइडे म्यूजिकल इभिनिङ’

नेवा: अनलाइन न्युज – ललेन्द्र शाक्य | २०७६ श्रावण २४, शुक्रबार १२:५१:३९

‘स्वस्थ कलाकार, स्वस्थ मनोरञ्जन’ नारा बियाः नेपालभाषाया नांजाःम्ह कलाकार ‘स्वतन्त्र संसार महर्जनयात ग्वाहालि यायेनु...’ धकाः आह्वान यासें सुखावती मल्टि प्रोडक्सनया ग्वसालय् ‘गुड फ्राइडे म्यूजिकल इभिनिङ’ ज्याझ्वः थौं श्रावण २४ गते जुइगु तयारी जुयाच्वंगु दु ।

येँया ढल्कोया पाराडाइज ब्यांक्वेटय् सनिलया ५ ता इलय् जुइगु उगु ज्याझ्वलय् थीथी सोलो म्यूजिक धून, हुलाप्याखं लिसें नांजाःपिं थीथी संगीतकःमिपिनिगु सांगितिक ब्वज्या जुइगु ज्याझ्वः तयातःगु दु ।

उगु ज्याझ्वलय् अभय डंगोल, गंगा महर्जन (अवाले), सुनिता डंगोल व रेन्वो जुम्बापाखें हुलांप्याखं न्ह्यब्वइगु जूगु दुसा हरिशरण सायमि, जीवित जल्मी व अन्ताज नकःमिं सोलो तुङनाया धून न्ह्यब्वयादीगु जूगु दु ।

अथेहे, सांगितिक ब्वज्याय् नांजाःपिं संगीतकःमि भीम तुलाधर, बबिन प्रधान, जेम्स प्रधान, संजय श्रेष्ठ, यमन श्रेष्ठ, सुरेश प्रधान, भुपेन्द्र बज्राचार्य, किशोरकुमार शाही, कपिल कसपाल, पुष्पराज शाक्य, बिष्णुसुन्दर देसेमरु, सजेश मानन्धर, निशा देशार, सरीता शाही, लसता जोशी, रोजी डंगोल श्रेष्ठ, एन्जिला श्रेष्ठ, गंगादेवी महर्जन व सोनी राजभण्डारीपिनिगु सांगितिक प्रस्तुति जुइगु जूगु दु ।

थौं शुक्रवाः जुइगु ‘गुड फ्राइडे म्यूजिकल इभिनिङ’य् सहभागी जुइगु नितिं १५०० तकाया टिकट तयातःगु दुसा ककटेल डिनरया ब्यवस्था दूगु जानकारी नं बियातःगु दु ।

ताःई न्ह्यःनिसें नांजाःम्ह कलाकार स्वतन्त्र संसार महर्जनया जँया ल्वचं यानाः छपा तुति कमजोर जुयाः न्यासि जुइत समस्या जुयाच्वंगु खःसा आः वय्कःया अपरेशन जुइगु ई वयाच्वंगु दु । उगु अपरेशनया नितिं २० लखसिबें अप्वः तका दां खर्च जुइगु स्रोतं धाःगु दु ।

वय्कः कलाकार स्वतन्त्र महर्जनया वासः यायेगु नितिं हे सुखावती मल्टि प्रोडक्सनं थुगु ज्याझ्वः याःगु खःसा सीदू कथं १५०० वंगु टिकटया मूपाखें न्यासः तकाः कलाकार स्वतन्त्र महर्जनया कोषय् वनीगु जूगु दु ।

खय्तला, कलाकार स्वतन्त्र संसार महर्जनया उगु ल्वय्या विषयस नेकपाया सांसद कृष्णगोपाल श्रेष्ठं वय्कः महर्जनया ल्वय्या वासः यायेगु बचं नं बियादीगु खः ।

सांसद भाजु श्रेष्ठं येँया नेपाः ब्यांक्वेटय् जूगु छगू ज्याझ्वःया झ्वलय् स्वयं कलाकार स्वतन्त्र संसार महर्जनया न्ह्यःने वासः यानाबिइगु बचं बियादीगु खः । भाजु कृष्ण गोपाल श्रेष्ठं उगु इलय् थः स्वास्थ्यमन्त्री जुइत्यंगु खँ न्ह्यथंसें कलाकार स्वतन्त्र संसार महर्जनयात जुयाच्वंगु ल्वय्या वासः यायेगु बचं बियादीगु खःसा भाजु श्रेष्ठ स्वास्थ्यमन्त्री मजुइधुंकाः वय्कलं बियादीगु बचं नं गन तं गन तं जूगु खः ।

Categorized in कला