telecom 18 kartik 2076

कलाकार संघया भिंतुना कालबिल ज्याझ्वः क्वचाल

नेवा: अनलाइन न्युज – ललेन्द्र शाक्य | २०७६ आश्विन २६, आइतबार १३:५७:१८

नेपाल चलचित्र कलाकार संघया ग्वसालय् नेपाःमिपिनिगु तःधंगु नखः मोहनी, स्वन्ति व छठ लिसें नेपाल संवत् ११४० न्हूदँया लसताय् भिंतुना कालबिललिसें सिन्हः तिइगु ज्याझ्वः जूगु खः । उगु ज्याझ्वलय् तुच्चा ज्याझ्वः नं जूगु खः ।

शुक्रवाः येँया धुम्रबाराहीइ च्वंगु स्काई रेस्ट्रो व ब्यांक्वेटय् जूगु उगु ज्याझ्वलय् आपालं कलाकारपिनिगु उपस्थिति दूगु खः ।

ज्याझ्वलय् संघया नायः रविन्द्र खड्का व विशिष्ट संकिपाकःमि व साहित्यकार यादव खरेलपिनिगु उपस्थिति दूगु खः ।

ज्याझ्वलय् संघया न्वकू मोहन निरौलां औपचारिक ज्याझ्वःया उद्घोष याःगु खःसा उगु ज्याझ्वलय् संघया मूछ्याञ्जे चेतबहादुर सिंह ‘राजां’ लसकुस न्वचू ब्यूगु खः ।

नेपाल संगीत तथा नाट्य कला प्रतिष्ठानया उपकुलपति व संघया पुलांम्ह नायः लिसें सल्लाहकार हरिहर शर्मा, संघया मेम्ह पुलांम्ह नायः लिसें सल्लाहकार व नेपाल फिल्म सोसाइटीया नायः कृष्ण मल्ल, संघया वर्तमान सल्लाहकार मदुकुमार श्रेष्ठ, चलचित्र निमाृता संघया नायः आकाश अधिकारी, बरिष्ठ अभिनेता टिका भण्डारी, बरिष्ठ चरित्र अभिनेत्री लक्ष्मी गिरी, बरिष्ठ गायक आनन्द कार्की, बरिष्ठ निर्देशक डा. घनश्याम खतिवडा, बरिष्ठ नायक धिरेन शाक्य, पुरन जोशी, नेपालभाषा संकिपाया न्हापांम्ह महानायक जय श्रेष्ठ, बरिष्ठ सिने पत्रकारलिसें निर्देशक विजयरत्न तुलाधर, डब्बु क्षेत्री, सरोज प्याकुरेल लिसेंयापिन्सं संघं नेपाःमिपिनिगु तःधंगु नखः मोहनीया लसताय कलाकारपिन्त छगू हे थासय् मुनाः भिंतुना कालबिल यायेगु पलाः बांलाःगु कुतः धासें संघं याःगु ज्याझ्वःयात च्वछाःगु खः ।

संघया ३१ दँया ताःहाकःगु इतिहासय् न्हापांगुखुसि न्ह्याकूगु मोहनीया भिंतुना कालबिल व सिन्हः तिइगु लिसें थीथी ज्याझ्वःया भाइचाराया सम्बन्ध व तःधीपिन्त सम्मान व चीधंपिन्त माया मतिना व प्रोत्साहन यायेगु आज्जुं याःगु उगु ज्याझ्वलय् सिन्हः तिकाः ३०१ तकाया दरं सकलसित दक्षिणा तकं लःल्हाःगु खः ।

ज्याझ्वलय् कलाकार, म्येच्वमि, संगीतकःमि, संकिपालिसे स्वापू दूगु थीथी संघसंस्थाया प्रतिनिधिपिनिगु तःधंगु उपस्थिति लिसेंया लसता ज्याझ्वः यानाः क्वचायेकूगु खः ।

Categorized in कला