nepal life 2076 3 18

Error message

Deprecated function: The each() function is deprecated. This message will be suppressed on further calls in _menu_load_objects() (line 579 of /home/newahub/public_html/includes/menu.inc).

कर धैगु कर हे खः, करं हे नं कर पुलेमाः –अर्थमन्त्री खतिवडा

नेवा: अनलाइन न्युज | २०७६ श्रावण १९, आइतबार १६:३२:५२

अर्थमन्त्री डा. युवराज खतिवडां स्वच्छ कर प्रशासनया माध्यमं राजश्व संकलन यानाः फुक्क नागरिकपिन्त सामाजिक सुरक्षा उपलब्ध याकाः याकुसें विकासयात तीव्रता बिइत सरकार क्रियाशील जूगु धाःगु दु ।

आन्तरिक राजश्व विभागं थौं आइतवाः ग्वसाः ग्वःगु व्यवस्थापन गोष्ठीइ अर्थमन्त्री खतिवडां कर प्रणालीयात वैज्ञानिक यायेगु व एकीकरण यायेगु सन्दर्भय् सुधारया कुतः जुयाच्वंगु जानकारी ब्यूगु खः ।

अर्थमन्त्री खतिवडां आः जूगु सुधारपाखें व्यवसायी ग्यायेम्वाःगु धाःगु दु । खतिवडां व्यावसायिक कारोबार पारदर्शी जुइमाःगु धासें निष्पक्ष व सदाचारी प्रशासन समयन्त्रया नितिं सुधारया कुतः जुयाच्वंगु धाःगु दु । मन्त्री खतिवडाया कथं सरकार राजश्वमुखी जक मखु, सकल नेपाःमि जनताया आशा व भलःसाया रुपं ज्या यानाच्वंगु दु ।

अर्थमन्त्री खतिवडां धाःगु दु, “आपालं नागरिक आयकरया दायराय् वइगु स्थिति वःगु दु । स्वेच्छिक रुपं वःसा कर पूवःम्हेसित लसकुस दु । स्वेच्छिक जक मखु, आम्दनी याःगु दुसा अनिच्छुकं नं कर पुलेमाः । कर धैगु कर हे खः। करं हे नं कर पुलेमाः, उकिं स्थायी लेखा नम्बर दयेमाः धाःगु खः ।”

सुरुवाती दिनय् प्रणाली स्थापित यायेत छुं थाकुइगु स्वाभाविक खः धासें अर्थमन्त्री खतिवडां सरकार निरन्तर आर्थिक स्थायित्व कायम यानाः मुलुकय् विकास व समृद्धियात न्ह्यःने यंकेगु सन्दर्भय् दूगु साधन स्रोतया अधिकतम परिचालन यानाः परनिर्भरता ज्या यायेगु व रणनीतिइ न्ह्यःने वनेत राजश्वया सुद्दढ आधारया नितिं पलाः न्ह्याकाच्वनागु धाःगु दु ।

संस्थागत आय प्रणालीइ पारदर्शिता स्थापित जुयावंगु व अनुत्पादक व व्यक्तिगत क्षेत्रयात अझ नं आयकरया दायराय् हयेगु कुतः जुयाच्वंगु धासें धाःगु दु, “मनूया ख्वाः स्वयाः छुट बिइगु प्रवृत्तियात अन्त्य यायेगु जूगुलिं आः कर प्रशासनलिसे व्यवसायी ग्यायेगु व व्यावारीलसे कर प्रशासन ग्यायेगु स्थिति अन्त्य यायेमा, करया दर अप्वयेकेगु थाय् मदु, दायरा अप्वयेकाः यंकेमाः ।”

ततःधंगु उद्योग व्यवसाय संचालन यायेगु ज्या याइपिन्सं १३ प्रतिशत करया हिसाब तयेमफुगुयात झीसं गुकथं कायेगु धकाः न्ह्यसः तसें वं लिपांगु ई आर्थिक क्षेत्रय् आपालं हिउपाः वयाच्वंगु व राजश्वया नं निरन्तर बृद्धिं मद्दिक्क स्वदँतक उच्च बृद्धिदर हासिल यायेत सुथां लाःगु धाःगु दु ।

अर्थमन्त्रालयया राजश्व सचिव लालशंकर घिमिरें निजी क्षेत्रयात कर पुलेत प्रोत्साहन यायेत कर प्रशासनय् छु गुज्वःगु सुधार माः धैगु सन्दर्भय् जानकारी कायेत गोष्ठीया ग्वसाः ग्वयागु धाःगु दु ।

नेपाल उद्योग वाणिज्य संघया न्वकू किशोर प्रधानं कर प्रशासनय् सुधार मदयेकं मगाःगु धासें निजी क्षेत्रयात विश्वासय् कयाः न्ह्यःने वंगु खण्डय् मुलुकं चीहाकःगु इलय् हे विकास व समृद्धि कायेफइगु धाःगु दु ।

नेपाल चेम्बर्स अफ कमर्शया नायः राजेशकाजी श्रेष्ठं औद्योगिक विकासया माध्यमं आयात म्हो यायेफइगु जूगुलिं सरकारया उखेपाखे ध्यान वनेमाः धाःगु दु ।

नेपाल उद्योग परिसंघया नायः सतिशकुमार मुरं कर पुलीपिन्त सम्मान व उत्प्रेरित जुइगु लकस दयेकेत सरकारयात सुझाब ब्यूगु दु ।

निन्हु जुइगु उगु गोष्ठीइ आन्तरिक राजश्व विभाग मातहतया थीथी ज्याकुथिया ७० सिबें अप्वः उपसचिवपिनिगु सहभागिता दूगु खः ।

Categorized in बजाः