telecom 18 kartik 2076

कन्हय् शनिवाः १९७४ एडीया कन्सर्टया नितिं तयारी

नेवा: अनलाइन न्युज – ललेन्द्र शाक्य | २०७६ कार्तिक २२, शुक्रबार १८:४६:३५

नेपाःया सर्वाधिक चर्चित ब्याण्ड १९७४ एडीया कन्सर्ट कन्हय् कार्तिक २३ गते शनिवाः न्हिनसिया ३ ता इलंनिसें किपूया १० वडा बसपार्क खेलकुद मैदान न्हूबजारय् जुइगु जूगु दु । 

उगु कन्सर्टया नितिं थनिं निन्हु स्वन्हु न्ह्यःनिसें भव्य तयारी जुयाच्वंगु दु । 

उगु कन्सर्टय् अतिकं लोकंह्वाःगु फ्यूजन ब्याण्ड कुतुम्बलिसे १९७४ एडीया संयुक्त सांगितिक ब्वज्या जुइगु जानकारी नं ब्यूगु दु । 

किपूया कीर्ति इभेन्ट्सया ग्वसालय् जुइगु उगु कन्सर्ट नेपाःया हे दकले न्हापांगुखुसिया बिस्कं पहःया कन्सर्ट जुइ धकाः १९७४ एडी ब्याण्डया दुजः निराकार याक्थुम्बां पत्रकार सम्मेलनय् जानकारी बियादीगु खः । अथेहे, कन्हय् शनिवाःया उगु कन्सर्टय् न्याद्वलं मल्याक दर्शकपिनिगु उपस्थिति दइगु कीर्ति इभेन्ट्सया नायः राकेश महर्जनं जानकारी बियादीगु दु । 

स्टेज, माईक, लाईट सिष्टम जक हे १२ लख तकां मल्याक तूगु उगु कन्सर्ट छगू ऐतिहासिक कन्सर्ट जुइगु जानकारी १०७४ एडी ब्याण्डया एड्रिन प्रधानं धयादीगु दु ।

आः वइगु भिजिट नेपाल २०२० या सफलताया कामना यासें जुइगु कन्सर्ट ज्याझ्वलय् सकलसित सहभागिताया नितिं ग्वसाः खलः कीर्ति इभेन्ट्सं इनाप याःगु दु ।

अथेहे, उगु कन्सर्टय् सहभागिताया नितिं स्वसः, न्यासः व द्वःछि वंगु टिकटया ब्यवस्था यानातःगु दुसा आः कन्सर्ट न्यासः वंगु जक टिकट ल्यंदनिगु जानकारी बिसें कन्सर्ट जुइगु थासय् न्यासः वंगु टिकट जक उपलब्ध जुइगु जानकारी ग्वसाः खलकं ब्यूगु दु ।

Categorized in कला