ad 2076 5 18

एभिसी सेन्ट्रल जोन भलिबल कासाया नितिं अफगानी पुचः नेपालय्

नेवा: अनलाइन न्युज | २०७६ श्रावण २८, मंगलबार १२:३६:२५

येँय् जुइगु एभिसी सेन्ट्रल जोन मिजं भलिबल कासाय् सहभागिताया नितिं अफगानिस्तानया राष्ट्रिय भलिबल पुचः थौं मंगलवाः नेपाः थ्यंकूगु दु ।

वइगु भाद्र २ गतेनिसें ८ गतेतक जुइगु कासाय् सहभागिता प्वंकेत अफगानिस्तानया राष्ट्रिय भलिबल पुचः नेपाः थ्यंकूगु खः ।

नेपाल भलिबल संघया पदाधिकारीपिन्सं त्रिभुवन अन्तर्राष्ट्रिय विमानस्थलय् अफगानिस्तान पुचःयात लसकुस याःगु खः ।

नेपालं अफगानिस्तानलिसे थ्वहे साउन २९ व ३० गते निगू मेत्रीपूर्ण कासा म्हितीगु जूगु दु । उगु कासा यलया लगंख्यलय् च्वंगु आर्मीया कभर्ड हलय् जुइ ।

उभिसी सेन्ट्रल जोनय् ग्वसा: खलः नेपाःलिसें साविक विजेता तुकृमेनिस्तान, एज्वेकिस्तान, अफगानिस्तान, माल्दिभ्स, किर्गिस्तान व बंगलादेश यानाः ७ गू राष्ट्रं धेंधेंबल्ला याइगु जूगु दु ।

थ्वहे च्याम्पियनसिपय् नेपालं स्वदँ न्ह्यः माल्दिभ्सय् जूगु कासाय् लियांल्यूया कास्य पदक त्याकूगु खः । नेपालं आःतक अन्तर्राष्ट्रिय भलिबलय् काःगु छगू जक पदक थ्वहे कासाय् खः ।

एभिसी सेन्ट्रल जोन म्हितूम्ह नेपाली भलिबल पुचःया कप्तानया भूमिका इमबहादुर रानां म्हितीगु जूगु दु ।

अथेहे, पुचःया मेमेपिं दुजःपिं कासामिपिं हरिहजुर थापा, नरेन्द्र गिरी, विशाल विक, राजकुमार निरौला, हरि अधिकारी, दुर्गा खड्का, दीपकराज जोशी, धनबहादुर भट्ट क्षेत्री, राजेन्द्र विष्ट, कुलबहादुर थापा, टेकराज अवस्थी, विनोदबहादुर चन्द व ईश्वर थापा मगर दु ।

Categorized in कासा