telecom 18 kartik 2076

एनआरएनया थापायात न्ययद्वः तका व मिसायात नीन्याद्वः तका जरिवाना

नेवा: अनलाइन न्युज | २०७६ आश्विन २९, बुधबार १३:५१:१४

एनआरएनया गुक्वःगु अन्तर्राष्ट्रिय सम्मेलनय् सहभागी जुइत अष्ट्रेलियां नेपाः वःम्ह प्रतिनिधि रमेश थापा थुनामुक्त जूगु दु । थापायात अध्यागमन विभागं न्ययद्वः (५०,०००) तकाः धरौटी कयाः त्वःतूगु खः ।

त्रिभुवन अन्तर्राष्ट्रिय विमानस्थलया अध्यागमन विभागय् शनिवाः थापां तोडफोड यायेधुंकाः प्रहरीं गिरफ्तार याःगु खः ।

रिहाई यायेत एनआरएन नेताया दबाबया दथुय थापाविरुद्ध विभागं अध्यागमन ऐन, २०४९ व नियमावली, २०५१ कथं कारवाही याःगु खः । विभागया महानिर्देशक ईश्वरराज पौडेलं थापायात जरिवाना पुइकागु पुष्टि याःगु दु ।

पौडेलं धाःगु दु, “थापायात उक्सेयाःम्ह व अश्लील व्यवहार क्यःम्ह मेम्ह छम्ह मिसायात नं जरिवाना पुइकागु दु ।” अय्सां उक्सेयाmम्ह धाःम्ह मिसा धाःसा गिरफ्तारीइ मलाः ।

थापायात उक्सेयाःसां नं तोडफोडय् क्वाहाँ वःगु खनेमदुगुलिं उम्ह मिसायात गिरफ्तार मयाःगु खः । विभागया कथं उम्ह मिसा थापालिसें वःम्ह उषाकिरण वरिया खः । वयात नीन्याद्वः (२५,०००) तका जरिवाना पुइकूगु दु ।

थापालिसें न्याम्ह अष्ट्रेलियां नेपाः वःगु खः । त्रिभुवन अन्तर्राष्ट्रिय विमानस्थलया अध्यागमन कक्षय् पूवंकेमाःगु प्रक्रियाया नितिं इपिं लाइनय् च्वंगु खः । तर, ताःईतक लाइनय् च्वनेमाःगु धासें थापां डेस्कया न्हायकं तछ्याःगु अधिकारीपिन्सं धाःगु दु ।

घटनाधुंकाः अध्यागमनया कर्मचारीं प्रहरी सःताः थापायात ज्वंकूगु खः । सीसीटिभी फुटेजय् थापां जक न्हायकं तछ्याःगु खनेदूगुलिं वयात जक गिरफ्तार याःगु खः ।

वसिबें न्ह्यः येँपाखें सिंगापुर वनेत्यंगु इलय् अतिकं लगेजुइक अयलाः त्वनाः वःगु धासें सिल्क एयरया क्रु मेम्बर. एनआरएनएया नायः भवन भट्टयात व सनत न्यौपानेयात जहाजं पितनाहःगु खः ।

Categorized in दुर्घटना-अपराध