नेवा: अनलाइन न्युज – विजयरत्न | २०७६ श्रावण २, बिहिबार १३:२१:३५

नेपाःया वरिष्ठ सरोदवादक लिसें म्ये हालामि उस्ताद यसराज सुदर्शन राजोपाध्याययात भारतया राजस्थानय् तःजिक सम्मान याःगु दु  ।

वंगु आइतबाः जुलाइ १४ तारिखया दिं राजस्थान, जयपुरया जगतपुराय् च्वंगु सुरेश ज्ञान विहार विश्वविद्यालयस जूगु अन्तरराष्ट्रिय मैत्री सम्मेलनय् राजोपाध्याययात इन्टरनेशनल इन्डिएन बेस्टिज अवार्ड २०१९ पाखें सम्मान याःगु खः ।

आर.बि. फाउन्डेशन व भव्या इन्टरनेशनलया ग्वसालय् कलमकार मंचया संयोजनय् जूगु मैत्री सम्मेलनय् उस्ताद राजोपाध्याययात मुम्बईया समाजसेवी लिसें व्यवसायी सुरेश अग्रवालं बेस्टिज अर्वाड लःल्हानादीगु खः ।

असामया नांजाःम्ह  सामाजिक अभियन्ता शंकरलाल अग्रवालया अध्यक्षताय् जूगु उगु ज्याझवलय् सुरेश ज्ञान विहार विश्वविद्यालयया अध्यक्ष सुनील शर्मा, कलमकार मंचया संस्थापक शैलेन्द्र माथुर, मंचया निर्देशक डा. निशा माथुर लगायतपिनिगु ब्वति दुगु खः । 

ज्याझवलय् नेपालनापं भारत, मालदिभ्स, क्यानाडा लगायतया देसया नं ब्वति दुगु खः ।

अथेहे मैत्री सम्मेलनया ज्याझ्वलय् उस्ताद सुर्दशन राजोपाध्यायया विशेष सरोद वादनया प्रस्तुतिलिसें साहित्यिक सफूया विमोचन लगायतया ज्याझ्वः नं जूगुु खः ।

स्वगू दशक न्ह्यःनिसें संगीत साधना यानाः वयाच्वंम्ह सरोदवादक गायक उस्ताद राजोपाध्याययात थ्वया न्ह्यः सन् २०१३ य् भारतया पश्चिम बंगाल सरकारपाखें संगीत मंजरी उपाधी प्रदान याःगु खसाः सन् २०१५ य् भारतया गुजरातय् सुरिल साँझपाखें स्वर्णपत्र लःल्हाःगु खः ।

नेपाःया सन्दर्भय् उस्ताद राजोपाध्यायं रेडियो नेपालपाखें सन् २००२ स जूगु राष्ट्रव्यापी संगीत कासाय् न्हाप सिरपाः त्याकादीगु खःसा  शास्त्र सम्मान २०१८, सेभ दी नेशन अवार्र्ड लगायतया आपालं सिरपाः लिसें सम्मान कयादीगु दु । सरोदवादन बाहेक  उस्ताद राजोपाध्यायया खस भाषाय् पलपल, पानीसरी, त्यो रात, नेपालभाषाय् नसला, हसना, छन्हु निन्हु, छंगु मतिना, शास्त्रीय संगीतपाखे वन डे रागाज, सोल फूल म्यूजिक फर मेडिटेशन , भारतं सुरिल म्यूजिक इन २०१५ लगायत पिहाँ वःगु दु ।

Categorized in कला