nepal lifef 2076 8 8

उसायँ भिंकेत ह्यूपाः

नेवा: अनलाइन न्युज | २०७२ फाल्गुण २६, बुधबार १८:४७:५८

थौंया आधुनिक समाजय् मनूत थःगु उसायँ प्रति तसकं सजग जुया वनाच्वंगु दु । गामय् स्वयाः नं शहरी शिक्षित मनूतय् दथुइ स्वास्थ्य सुरक्षाया विषय मू रुपं न्ह्यःने वया चासोया विषय जुयाच्वंगु दु । छखें शहरी जीवनय् शिक्षा व सभ्यताया कारणं थःगु उसायँ प्रतिया सचेतना अप्वयाच्वंगु दु धाःसा मेखे विलासिता व विदेशी संस्कृतिया प्रभावं यानाः थःगु उसायँ स्यंकेगु ज्या नं यानाच्वंगु दु ।
थौंया मनूया दुश्मनया रुपय् मधुमेह (चिनिल्वय्), ब्लड प्रेसर, ह्दय रोग आपा ह्वनिगु आदि ल्वय् वयाच्वंगु दु । थुपिं ल्वय्त आपा याना विलासी मनूतय्त जुइगु जुया थुपिं ल्वय्त धनीया ल्वय् धकाः तकं धायेगु याः । थुपिं ल्वय्त मनूतय् गलत दिनचर्याया कारण उत्पन्न जुइगु विशेषज्ञतय् धापू दु । यदि नियमित ब्यायाम सन्तुलित आहार व सकारात्मक आचरण नालाकाल धाःसा थुज्वःगु ल्वय् पाखें बचे जुइफइगु स्वास्थ्य विशेषज्ञतय् धापू दु । उसायँ भिंकेत यायेमाःगु थीथी क्रियाकलापयात थन स्वये ।
न्हिच्छिइ बाघौया शारीरिक व्यायाम
चिकित्सकतसें म्होतिं नं न्हिच्छिया बाघौ ई शारीरिक ब्यायामया लागि छुटे यायेमाः । नियमित ब्यायामं म्हय् अतिरिक्त दाः मुनाच्वने फइमखु ब्यायामया मात्रां थःगु शारीरिक अवस्था स्वया यायेमाः । थुकिया लागि थःत गुकथंया ब्यायाम उपयुक्त जुइधइगु खँ फिटनेश एक्स्पर्टयाके न्यना सुझाव काल धाःसा बांलाइ । शारीरिक ब्यायामं म्हय् आवश्यक जुइगु अक्सिजन थ्यंकेगुया लिसें म्हन्यंक रक्तसंचार सुचारु जुइ । ब्यायाक यायेत जिम सेन्टर ब्यायामशाला वनेमाः धइगु मदु । थःगु छेँ य् हे नं योगासन वा प्राणायाम यायेफु ।
माक्व लः त्वनेगु


मनूयात गुलि लः माः धइगु खँ मौसम व शारीरिक श्रम, शारीरिक अवस्था व नइगु नशाय् निर्भर जुइ । अथें खयां नं छम्ह मनुखं न्हिच्छिया स्वंगू लीटर लः त्वनेमाः । आपाः लः त्वन धाःसा नसाय् दइगु अनावश्यक तत्वयात छानेयानाः पिकायेत ग्वहालि याइ । लःथें हे मेमेगु पदार्थ गथेकि सुप, जुसयात नं थाय् बिइमाः । म्हय् पर्याप्त लः दत धाःसा पाचन क्रियाय् तसकं ग्वाहालि याइ धाःसा शारीरिक शक्ति बिइत नं ग्वाहालि याइ ।
स्वस्थकर नसा


थःगु नसाय् फलफुल, वाउँगु क्ये तरकारी, चुलिवःगु बुवःयात आपा थाय् बिइमाः । जंक फुड, चिकनय् दयेकातःगु, दाः थाःगु नसा फयांफक्व मनयेगु वा म्हो जक नयेगु यायेमाः । अथे हे नयेबलय् प्वां टन्न जुइक नं नयेमज्यू । झीगु बानी न्हिच्छिया स्वक्वः टन्न च्वंक नयेगु जुयाच्वंगु दु तर अथे यायेगु स्वया न्हिच्छिया खुक्वः न्ह्यक्वः भचा भचा याना नसा नयेगु शरीरया लागि बांलाइ । थुकिं पाचन प्रणालीयात आपा भार जुइमखु धाःसा पाचन प्रणालीं नियमित रुपं ज्या यानाच्वनी । स्वस्थ जुया च्वनेगु खःसा चि नयेगु म्हो यायेमाः । न्हिच्छिया ३ ग्राम अथे धइगु छगू चिया चम्चा स्वयाः म्हो चि नयेमाः । अथेहे नसा नयेगु झ्वलय् टिभि स्वयेगु वा रेडियो न्यनेगु ज्या यायेमज्यू । अथे धइगु नसा नयेगु इलय् मेथाय् ध्यान मब्यूसे थःगु ध्यान मुक्कं नसाय् हे बिइमाः ।
छम्ह मनूया न्हिच्छिया नसाय् स्वंगू निसें प्यंगू चिया चम्चा स्वया आपाः चिकं छ्यले मज्यू । थुकिया आशय् धइगु नसा ज्वरे यायेगु इलय् थ्व स्वयाः आपा चिकं छ्यले मज्यू । न्हियान्हिथं चिकं आपा नयेगु यात धाःसा म्हया ग्यसू अप्वइ धाःसा म्हय् म्वाः मदयेक दाः मूंवनी । थुकिया लिच्वः लिपा वना उच्च रक्तचाप हदय रोग जुइफु ।
आउटडोर गेम


म्हितेगु धइगु नं छगू कथंया शारीरिक ब्यायाम खः । थौंया मस्त टिभी, इन्टरनेट कम्प्युटर गेमया कारणं क्वथाप्वांल पिने वयेगु वातावरण मब्यू तर क्वथाय् म्हितेगु थुज्वःगु कासा स्वयाः पिने म्हितेगेु कासा म्हंया लागि उपयुक्त जू । छगू अध्ययनकथं बाघौ जक म्हितल धाःसां ३०० क्यालोरी नष्ट जुइ । थुकथं वाःलय् स्वक्व बाघौया दरं म्हितल धाःसा म्हितुंम्हितुं ६ किलो वजन म्हो यायेफइ ।