chetrapa55

इराकय् च्वंगु अमेरिकी सैनिक क्याम्पय् हाकनं आक्रमण

नेवा: अनलाइन न्युज | २०७६ पौष २८, सोमबार ११:५५:४०

इराकय् च्वंगु अमेरिकी सैन्य अड्डाय् खुन्हुया अवधिइ स्वक्वःगुखुसि आक्रमण जूगु दु । लिपांगुखुसि आइतवाः अल बलादय् चवंगु एयरबेसय् प्यंगः रकेटपाखें आक्रमण जूगु बुखँ ऐजेन्सीपिन्सं न्ह्यथंगु दु । थ्व आक्रमणपाखें प्यम्ह घाःपाः जूगु धाःगु दु ।

अल बलाद एयरबेसय् अमेरिकी सेना च्वनाच्वंगु दु । तर इरान व अमेरिका दथुइ तनाव अप्वयेधुंकाः थ्व एयरबेस अमेरिकी सेनां त्वःतेधुंकूगु खः ।

आइतवाःया आक्रमण लिपा अमेरिकी विदेशमन्त्री माइक पोम्पियों ट्वीट यानाः अमेरिकाय् आक्रोश अप्वःगु प्रतिक्रिया ब्यूगु दु ।

थ्वहे जनवरी ९ तारिखय् बगदादया अन्तर्राष्ट्रिय क्षेत्रय् मिसाइल आक्रमण जूगु खः । आपालं देसया दुतावास दूगु थ्व ‘गिरन जोन’य् निगू तःधंगु विष्फोट नं जूगु खः । अमेरिकी अधिकारीपिन्सं थ्व आक्रमणय् इरान समर्थित शिया विद्रोही संगठन हासेदया ल्हाः दूगु दाबी याःगु दु ।

वसिबें न्ह्यः इरानं ७ जनवरीइ इराकय् अमेरिकी सेना च्वनाच्वंगु निगू थासय् २२ गः मिसाइल प्रसाह याःगु खः । अनबर प्रान्तया अल असद व इरबिल एयरबेसय् याःगु थुगु आक्रमणपाखें ८० म्ह अमेरिकी सेनाया ज्यान वंगु दाबी इरानं याःसां नं पुष्टि जूगु मदुनि ।

अमेरिकां ३ जनवरीइ इरानया कुदस सेना प्रमुख जनरल कासिम सुलेमानीया हत्या यायेधुंकाः इरान व अमेरिकादथुइ तनाव अप्वःगु खः । सुलेमानी स्याःगु बदला कायेत इरानं इराकय् च्वंगु अमेरिकी सैन्य अखडाय् २२ गः मिसाइल प्रहार याःगु खः । मिसाइल आक्रमणया कन्हय् कुन्हु इरानं १७६ म्ह च्वनावंगु युक्रेनया छगः बोइङ विमानयात कुतकूगु खः । उकिया विरोधय् इरानी जनता थः सरकारविरुद्ध आन्दोलनय् क्वाहाँ वःगु खः ।

Categorized in अन्तर्राष्ट्रिय