नेवा: अनलाइन न्युज | २०७६ माघ १४, मंगलबार १२:२४:३५

म्येहालामि आस्था राउतयात हिरासतं अस्पताल यंकूगुग दु । स्वास्थ्यय् समस्या वःगु धासें राउतयात येँया त्रिपुरेश्वरय् च्वंगु ब्लु क्रस अस्पतालय् भर्ना याःगु खः ।

येँ प्रहरी परिसर टेकुया प्रमुख उत्तमराज सुवेदीं म्हिगः सोमवाः सनिलय् हे राउतयात अस्पताल भर्ना याःगु जानकारी ब्यूगु दु । प्रहरी बरिष्ठ उपरीक्षक एसएसपी सुवेदीं धाःगु दु, “हाइपर टेन्सनया हुनिं समस्या जुइधुंकाः राउतयात अस्पताल यंकागु खः ।”

थ्वसिबें न्ह्यः माघ १ गते त्रिभुवन अन्तर्राष्ट्रिय विमानस्थलया आन्तरिक टर्मिनलय् प्रहरी जवान रमिता श्रेष्ठलिसे राउतया भनाभन जूगु खः । सिक्किमय् ग्वसाः ग्वःगु ज्याझ्वलय् सहभागी जुइत वनेगु झ्वलय् जूगु घटना लिपा आस्था राउतं फेसबुक लाईभ यासें प्रहरीयात ब्वःब्यूगु खः ।

राउतया भिडियो भाइरल जुइधुंकाः प्रहरी जवान रमिता श्रेष्ठं किटानी जाहेरी ब्यूगु खःसा प्यन्हु लिपा राउतविरुद्ध गिरफ्तारी पूर्जी जारी जूगु खः ।

म्हिगः सोमवाः सुथय् अभिभावनलिसें टेकु थ्यंकूम्ह राउतं प्रहरीया न्ह्यःने आत्मसमर्पण याःगु खः । वधुंकाः जिल्ला प्रशासन ज्याकुथि येँय् उपस्थ्ति याकूगु खःसा प्रहरीं राउतयात अनुसन्धानया नितिं प्यन्हुतकया नितिं अनुमति काःगु खः ।

सामान्य विवादय् गिरफ्तारी पूर्जी जारी यानाः प्यन्हुया म्याद थप याःगु धासें प्रशासनया आलोचना जुयाच्वंगु दु ।

Categorized in दुर्घटना-अपराध