ad 2076 5 18

आः येँय् विद्युतीय बस

नेवा: अनलाइन न्युज | २०७६ भाद्र २३, सोमबार १८:४४:२०

येँय् वायु प्रदुषण व ध्वनी प्रदुषणं थाय् कयाच्वंगु दु । थनया सार्वजनिक यातायातय् यात्रुपिन्त अतिकं थाकुयाच्वंगु दु । थुकियात न्यूनीकरण यायेत मंगलवाःनिसें येँय् ताःहाकःगु आकारया सुविधायुक्त विद्युतीय बस संचालनय् वःगु दु । थ्व बसय् ‘स्मार्ट यात्रा कार्ड’ कयाः यात्रा यायेबलय् २० प्रतिशत छ्यापं (छूट) कायेखनी ।

‘विजुली बस’ नं धाइगु विद्युतीय बस सेवाया उलेज्या उपप्रधान व रक्षामन्त्री ईश्वर पोखरेलं सोमवाः याःगु खः । सरकारी स्वामित्वया ट्रली बस बन्द जूगु छगू दशकलिपा निजी क्षेत्रया सुन्दर यातायातं न्हापांगु चरणय् निगः विद्युतीय बसं सेवा न्ह्याकूगु खः । छुं दिं दुने हे थप निगः बसं येँय् सेवा न्ह्याकीगु जूगु दु । कम्पनीं आः नेपालय् विद्युतीय सार्वजनिक सवारीया युग सुरुआत जूगु घोषणा याःगु दु । साझा यातायातं न्हापांगु चरणय् थ्यंमथ्यं ५० गः विद्युतीय बस हयेगु तयारी यानाच्वंबलय् सुन्दर यातायातं छपलाः न्ह्यःने वयाः न्हापांगु विद्युतीय बस संचालनय् हःगु खः ।

रिंगरोडय् चलेयाइगु थ्वसिबें न्ह्यः सरकारं लुम्बिनीइ चलेयायेगु कथ. हःगु विजुली बस साझापाखें छुं इ चलेयायत ब्युगु खः । तर, संचालन सुरुआत मजुसे हे मापदण्ड कथंया बस मवःगु धासें लितछ्वःगु खः ।

सुन्दर यातायातं आः हःगु बस ब्याट्रीपाखें चलेजुयगु बीएके कम्पनयिा खः । विजुली बस चलेयायेत कम्पनीं रिंगरोडया रुट काःगु दु । कम्पनीं थप ११ गः बस हयेत चिनियाँ कम्पनीलिसे सम्झौता यायेधुंकूगु दु ।

थ्व दँ दुने २५ गः बस येँय् चलेयायेगु नितिं हइगु कम्पनी नायः भेषबहादुर थापां धाःगु दु । कम्पनीं प्रतिबस १ करोड ६२ लख तका दां खर्च याःगु दु । आः चलेजुयाच्वंगु बसत सिबें थुगु बिजुली बस ब्यागलं हे खनेदइ । थुगु बस नेपाली सतक मैत्री जू । विदेशय् चलेजुयाच्वंगु विद्युतीय बसया बनावट नेपाःयात पायछि मजुइगु खनेधुंकाः सुन्दर यातायातं चिनियाँ प्राविधिकपिन्त नेपालय् हे सःताः नेपाली सतकया अवस्था अध्ययन याकाः बसया डिजाइन याकूगु खः । गाःगीया हुनिं चलेयायेत समस्या जुइगु जुइधुंकाः नेपाःया नितिं ब्यागलं प्राविधिक डिजाइन याःगु खः ।

सुन्दर यातायातं दुतहयेधुंकूगु व दुकायेत्यंगु थप बस ४० सिट क्षमतातकया दु । उगु बसत येँया चक्रपथलिसेंया सहर दुनेया प्रायः फुक्क रुटय् चलेयायेगु कम्पनीं धाःगु दु । मोबाइलपाखें हे भाडा पुलेफइगु

कम्पनीं विद्युतीय बसयात ४० मिनेटय् चार्ज यायेफयगु धाःगु दु । चच्छि ६ घण्टा ई बिकाः चार्ज यायेगु विकल्प नं दु । कम्पनीं व.गु वाः हे थःगु चार्जिङ स्टेशनया उलेज्या यायेधुंकूगु दु । उगु बसय् हे आधुनिक तवरया स्मार्ट पेमेन्ट सिस्टम स्वानातःगु दु । स्मार्ट यात्रा कार्डपाखें भाडा पुलेफइ । मोबाइलं ‘क्यूआर कोड’ स्क्यान यानाः नं रकम भुक्तानी यायेफइ ।

आधुनिक ‘सस्पेन्सन सिष्टम’ लिसे.या थुगु बसय् यात्रा यायेत आरामदायी नं जुइगु कम्पनीया धापू दु । थुगु बसय् ल्यूनेया सिटत यात्रुया आकर्षणया केन्द्रय् जुइ । छाय् धाःसा ल्यूनेया सिटय् च्वनेबलय् फिल्म हल दुने बालकोनइि च्वनेथें अनुभव जुइ ।

बसया मू थिके, तर संचालन खर्च म्हो

थ्व बसदुने बसय् हे स्मार्ट डस्टबिन, मिँ स्यायेगु यन्त्र, आकस्मिक अवस्थाय् पिहाँ वनेमालीबलय् न्हाय्कं तछ्यायेगु ह्याम्बर लिसेंया उपकरण नं दु । गुगु आःतक नेपाःया सार्वजनिक यातायातय् छ्यःगु खनेमदु । एयर कन्डिसनर सेवा लिसेंया उगु विद्युतीय बस वातावरणमैत्री जुइ । थुगु बसं छुं नं कथंया इन्धन खपत याइमखुसा डिजेल गाडींथें चर्को ध्वनी नं पिकाइमखु ।

विद्युतीय बसतय्गु संचालन खर्च नं अतिकं दनी । आः येँय् न्ह्यानाच्वंगु डिजेलपाखें चलेजुइगु ताःहाकःगु गाडीतसें प्रति ३ निसें ५ किलोमिटर दूरी पार याइबलय् १२० तका दां खर्च याइ ।
तर, विद्युतीय बसया संचालन खर्च वसिबें अतिकं म्हो जू । प्रत्येक ५ किलोमिटरय् बीएके कम्पनीया संचालन खर्च २० तका दां जक तुइगु कम्पनीया धापू दु ।

खरिद मू धाःसा डिजेल गाडीयासिबें थ्यंमथ्यं प्यंगू गुणा थिके जू । तर नं कम्पनीं सरकारं अनुमति ब्यूसा मेमेपिनिगु सिबें म्हो भाडाय् हे यात्रुपिन्त सेवा बिइगु धाःगु दु । यात्रा कार्ड कयाः यात्रा याइबलय् २० प्रतिशत छूटया व्यवस्था याःगु नायः थापां धाःगु दु । सरकारं विद्युतीय सवारीया नितिं ब्यागलं भाडा दर क्वःमछ्यूगुलिं कम्पनीं यत्रा कार्डपाखें यात्रा यायेबलय् छम्ह यात्रुयात २० प्रतिशत छूट जुइगु कथं लाभ बिइगु धाःगु दु । कम्पनीं २१५ तका दांया यात्रा कार्डया मिइगु ज्या नं न्ह्याकेत्यंगु दु ।

Categorized in बजाः