chetrapa55

आः नेवाः लहना पोखराय् नं, भाद्र ६ निसे. ११ गतेतक उलेज्या ज्याझ्वः

नेवा: अनलाइन न्युज – ललेन्द्र शाक्य | २०७६ श्रावण २९, बुधबार १२:३३:०१

नेवाः लहना, थनि १३ दँ न्ह्यः किपूया १ वडा, थांबहाः त्वालय् अनया स्थानीय राजमान मानवलिसें केशव स्थापितपिनिगु न्ह्यलुवाय् स्थानीय बासिन्दापिं जानाः पलिस्था याःगु छगू नेवाः जीवन्त खुल्ला संग्राहालय लिसें नेवाः नसात्वसाया केन्द्र खः ।

नेवाः लहना, किपू लागा जक मखु, स्वनिगलय् जक मखु, नेपालय् जक मखु, हलिंन्यंकं हे बय् बय् जुइधुंकूगु छगू नेवाः नसात्वसाया छगू बिस्कं पहःया केन्द्र हे जुइधुंकूगु दु ।

आः वयाः थुगु हे नेवाः लहना, किपू लागाय् जक लिकुनाः मच्वंसें किपूली पिने अर्थात् स्वनिगलं पिने नं थ्यंकूगु दु ।

आः नेवाः लहना पोखरा ५ या मालेपाटन गणतन्त्र चोकय् नं पलिस्था याःगु दु । पोखराय् थुगु नेवाः लहना वइगु भाद्र ६ गतेनिसें ११ गतेतक खुन्हुतक उलेज्या ज्याझ्वः तयातःगु दु ।

नेवाः लहना ग्रुपं ब्वनातःगु उगु पोखराया नेवाः लहना उलेज्या भाद् ६ गतेनिसे. ११ गतेक न्हिनसिया १ ता ईनिसें बहनीसिया ८ ता ईतक न्ह्याइगु जानकारी ब्यूगु दुसा ग्वसाः खलः नेवाः लहना ग्रुपं पोखराया उगु नेवाः लहना उलेज्या ज्याझ्वलय् सहभागिताया नितिं सकलसित इनाप याःगु दु ।

नेवाः लहना आः पोखराय् पलिस्था जुइसा थ्वयां न्ह्यः बुटवलय् पलिस्था जुइधुंकूगु दु । अथेहे, थ्वहे नेवाः लहना भ्वत (बनेपा)य् नं पलिस्था जुइधुंकूगु दु ।

नेवाः लहनाया संचालनय् किपू १ वडा थांबहाःत्वाःया सकल त्वाःबासीपिं शेयर होल्डर खःसा अन त्वाःया ज्येष्ठ नागरिकपिं, भौमचापिं, काय् मचापिन्सं नेवाः लहनाय् लजगाः न्ह्याकाच्वंगु दु ।

अथेहे, नेवाः लहनां मसला उत्पादन, बेकरी दुने थीथी हलंज्वलं उत्पादन, वसः उत्पादन इत्यादी यानाः वयाच्वंगु दुसा नेवाः लहना विश्व सरसफाई अभियान कथं नेवाः लहनाया नायः राजमान मानव लिसें दुजः शुशीला महर्जन सुचुपिचु अभियानय् पलाः न्ह्याकाः नेवाः लहनाया म्हसीका बिइगु पलाः न्ह्याकाः वयाच्वनादीगु दु ।

Categorized in नेवाः