telecom 18 kartik 2076

असं कोथुननी ल्यकेत गुथि संस्थानया बिरोध छाय् ? (ब्वनादिसँ ज्ञापन पौं)

नेवा: अनलाइन न्युज – निश्चल | २०७६ भाद्र १०, मंगलबार १२:०४:४५

असं कोथुननी बचाउ अभियानं वंगु आइतवाः असन कोथुननी थुनाः ब्यापारी भवन दयेकेतयंगु बिरुद्ध असनं जुलुस सहित गुथि संस्थानय् धेराउ ज्याझ्वः यासें ज्ञापन पौं लः ल्हागु दु ।
थथे लः ल्हागु ज्ञापन पौं पतिइ छुं खँ न्ह्यथनातःगु दु ?  ब्वनादिसँ  ज्ञापन पौं

गुठी संस्थान
केन्द्रीय कार्यालय
त्रिपुरेश्वर, काठमाडौं ।

गुथि परम्परा नेपाःया धार्मिक, सांस्कृतिक व सामाजिक जीवनलिसें क्वातुक्क स्वानाच्वंगु विषय खः । अथे जुयाः थ्व नेपाःमितय्गु अस्तित्व व म्हसीकालिसें स्वानाच्वंगु दु । गुथि संस्थानयात गुथि परम्परा व उगु परम्परा चले यायेगु आयस्ताया व्यवस्थापनया जिम्मा बियातःगु दु । उमितं अमानती गुथि न्ह्याकेत गुथि संस्थानया एकलौटी हाकभोग जुइगु जग्गाया रेखदेख व व्यवस्थापन थ्व लिसें हे स्वानाच्वंगु विषय खः । थ्व व थज्याःगु गुथि संस्थानया पुवंक स्वामित्वय् दुगु छेँ, सम्पदा गुलि गथे संरक्षण यायेफत, थ्व सम्वन्धि सन्तुष्टि, असन्तुष्टि, गुनासो वा व्यवस्थापन पक्षय् दुगु त्रुटी वा अनियमितता बारे आपालं चर्चा जुइगु याः । थ्व प्रतिया जवाफदेहिता व उत्तरदायित्व गुथि संस्थानयागु खः । थुकिं संस्थान लिचिले दइमखु ।
थुगु ज्ञापनपत्र मार्फत् गुथि संस्थानं पूर्ण स्वामित्व स्थापित निगू सम्पदा स्थल छायाँदेवी कम्प्लेक्स व असन कोथुननिया गुथिइ संस्थानं म्हितूगु भूमिका जन अपेक्षित मजूगु ध्यानाकर्षण व खबरदारी याकाच्वना । थुगु ज्ञापनपतिइ झिंन्याद्वः नेपाली नागरिकया मंकाः जनअभिमत कथं हस्ताक्षर दुगु नं ध्यानाकर्षण याकाच्वना ।
१) नेपाःया सांस्कृतिक केन्द्र व बाणिज्य व्यापारया ऐतिहासिक धरोहर कथं लानाच्वंगु असन बजाःया पश्चिमपाखे च्वंगु श्री ५ या बायु देवता गुथि जने जूगु छेँय् याःगु निर्णय व श्रृखलाबद्ध रुपं गुथि संस्थानया पदाधिकारी व कर्मचारीतय् विचार प्रति असहमत प्रकट यासें ध्यानाकर्षण याकाच्वना ।
    उगु छेँ गुथि संस्थानया पूर्ण स्वमित्वय् दुगु सम्पत्ति खः । उगु छेँ गुथि संस्थानया स्वामित्वय् दुगुलिं यानाः वलिसें सनातन कालनिसे चले जुया वयाच्वंगु धार्मिक सांस्कृतिक महत्व र परम्परा स्वानाच्वंगु पुष्टि जुइ । उगु छेँय् न्यासः दँ पुलांगु अभिताभ बुद्धया मूर्ति लानाच्वंगु दु । उगु मूर्तिया कालखण्डबारे पुरातत्व विभागं नापं पुष्टि याये धुंकूगु दु । उकियात अशोक बृक्ष बिहार कोथुननि धाइ । उकिं थ्व छेँ सम्पदा स्थल खः धइगु खँय् निगू मत मदु । तर गुथि संस्थान थ्व खँयात स्वीकार यायेत तयार जूगु न्यने मदुगुलिं जिपिं सम्पदाह्यमिपिं अजू चायाच्वनागु दु । थुगु सम्पदायात सम्पदा कथं हे पुनःस्थापना यायेमाः धइगु माग थ्वहे ज्ञापनपत्र मार्फत् यानाच्वना । उकिया लागिं गुथि संस्थानं २०७४ साल भाद्र महिनाय् बज्रयोगिनी सहकारी संस्थालिसें थुगु सम्पदा स्थलय् बिजनेस कम्प्लेक्स दयेकेगु याःगु २५ दँ अवधि दुगु सम्पदा संरक्षणया दृष्टिं दुष्ति करार सम्झौता खारेज यायेत जोडदार माग याये । उगु सहकारी संस्थालिसें करार सम्झौता याःबलय् जूगु व खनेदुगु कमी कमजोरीतय्पाखें अनियमितताया आशंका दुगुलिं उकियात नं छानविन यानाः दोषीयात कारवाही यायेत नापं माग यानाच्वना ।
उगु करार सम्झौताय् खनेदुगु कमी कमजोरीत अलग्ग न्ह्यथना दुथ्याकागु दु ।
२) असन कोथुननि मेगु छायादेवी कम्प्लेक्स थेंज्याःगु मजुइमाः धइगु जिमिगु चिउताः खः । छायाँदेवी कम्प्लेक्स निर्माणं क्षति याःगु साँंस्कृतिक सम्पदा बारे बिरोध सदां दया हे च्वनी । ठमेल भगवान बहालया पूर्वपाखे च्वंगु पलेस्वां पुखू स्यंकाः छायाँदेवी कम्प्लेक्स नांगु भवन दयेके न्ह्यःनिसें हे सम्पदाप्रति अभियन्तातय्सं निरन्तर खबरदारी व विरोध याना वयाच्वंनागु खः । तर आः वयाः भवन भवन दयेके धुंकूगु नमय् ‘तै चूप मैं चुप’ या स्थिति कायम यायेत स्वयाच्वंगु दु । दयेके धुंकूगु भवन थुनेगु माग याःपिं धकाः अःखः भवन दयेके न्ह्यःनिसें हे बिरोधय् दुपिं सम्पदा प्रमी अभियन्तातय्गु मानमर्दन यायेत स्वयाच्वंगु दु । उगु पुखू सम्पदा खःख् धइगुलि सुनानं मेगु धायेफुगु मदु, तर संरक्षणया न्ह्यलुवा जुइमाःगु गुथि संस्थानया भूमिका अग्रणी र प्रभावकारी छाय् जुइमफुत ? थ्व सम्वन्धी गुथि संस्थानया ध्यानकर्षण याकुसें सम्पदा संरक्षणय् लगे जूपिं जनतायात ग्वाहालि यायेत इनाप यानाच्वना ।
३) मिति २०७६ साल श्रावण ५ गते सम्पदाह्यमि अभियन्तातय्सं राष्ट्रिय पहिचान संरक्षण संघर्ष समितिया नेतृत्वय् सुचनाया हक प्रयोग यानाः गुथि संस्थानया स्वमित्वया गे गुलि जग्गा दुगु खः, गे गुलि व्यक्तिया नामय् वन, गे गुलि अतिक्रमण लात, व गे गुलि छु कथं प्रयोग जुयाच्वंगु दु व गुथि संस्थानया भूमिका दुगु जात्रा पर्व संस्कृति छु छु खः धइगु जानकारी माग यागुलि याकनं उपलब्ध याकेत नं माग यानाच्वना ।
मूर्त अमूत सम्पदा संरक्षणया जिम्मा दुगु गुथि संस्थान थःगु जिम्मेवारी लिचिले दइमखु । यदि पञ्छे जुयेगु जुल धाःसा थुकिया आौचित्य समाप्त जुइगु व संरक्षणया जिम्मेवारी जनतां काये मालिगु स्थिति वइगुपाखे सचेत याकुसें थुगु ज्ञापनपतिइ न्ह्यथनातःगु मागत गम्भिरतापूर्वक ग्रहण याइत व कार्यान्वयन यायेत नं ध्यानाकर्षण याकाच्वना ।
    नमस्ते साय्मि
    संयोजक
असन कोथुननी बचाउ अभियान
न्हिल्याः ः २०७६÷०५÷०८

Categorized in बिचा: