chetrapa55

अरब सागरया माहा चक्रवात नेपाः वइला ?

नेवा: अनलाइन न्युज | २०७६ कार्तिक १७, आइतबार १४:४३:५२

छुं दिंनिसें स्वनिग:लिसें देसया आपालं थाय्या मौसम बुलुसेच्वंगु दु । मौसम खिमुसे च्वंगुलिं वालयाः च्वंपिं किसानपिं वा जकं वइगु खःला धकाः ग्याःचिकुइ लाःगु दु ।

मौसम पूर्वानुमान महाशाखाया कथं, मौसम बुलुसे च्वंसां नं वा वइगु सम्भावना धाःसा तत्कालयात मदु । तर, वायुमण्डलया प्रदुषणं अन्तर्राष्ट्रिय उडान धाःसा प्रभावित जुइफूगु खतरा ब्वलंगु दु ।

महाशाखाया मौसमविद् बरुण पौडेलं वा वइगु न्हूगु प्रणाली विकसित मजुगुलिं ग्यायेमाःगु अवस्था मदूगु धाःगु दु । पौडेलं धाःगु दु, “आःया प्रणालीं वा वइमखु, उकिया नितिं न्हूगु प्रणाली विकास जुइमाः, तर तत्काल वा वइगु प्रणाली विकास जुइगु सम्भावना मदु ।”

भारतया प्रदुषणया लिच्वः नेपाःतक

लिपांगु इलय् देसया आपालं थासय् हुस्सु खनेदूगु दु । प्रदुषण अप्वःबलय् स्वनिगःलिसें आपालं थासय् हुस्सु खनेदूगु मौसम पूर्वानुमान महाशाखाया धापू दु ।

पौडेलं धाःगु दु, “फय् वइगु मौमसय् वायुमण्डलय् खनेदूगु प्रदुषण पुइकाः यंकी व हुस्सु खनेदइमखु । तर आः फय् वइगु मौसम मजूगुलिं प्रदुषण अप्वःगु दु । वहे प्रदुषणया हुनिं वायुमण्डलया पारदर्शिता म्हो जूगु दु ।”

छुं दिंनिसें अप्वःगु प्रदुषण जलाखला देय् भारतया नितिं छ्यं स्याःगु विषय जूगु दु । वायुमण्डल प्रदुषित जुइधुंकाः दिल्ली सरकारं सार्वजनिक स्वास्थ्य क्षेत्रय् संकटकाल हे घोषणा याःगु दु । निर्माण ज्याय् प्रतिबन्ध तःगु दुसा स्कूल ६ नोभेम्बरतकया नितिं बन्द याःगु दु ।

भारतय् अप्वःगु प्रदुषणया लिच्वः नेपाःतक हे थ्यनगिु आकलन मौसम पूर्वानुमान महाशाखां याःगु दु । महाशाखाया कथं भारतया प्रदुषण लिच्वःपाखें धूया कण छुं दिं अप्वइगु व हुस्सु खनेदइगु जूगु दु ।

अन्तर्राष्ट्रिय उडानय् लिच्वः लाइगु खतरा

अन्तर्राष्ट्रिय व राष्ट्रिय उडानय् फय्या पारदर्शिता अर्थात् भिजिबिलिटीया महत्वपूणृ भूमिका दइ । मौसमविदया कथं वायुमण्डलया पारदर्शिता ३ हजार मिटरसिबें म्हो जूसा अन्तर्राष्ट्रिय उडान यायेमज्यू ।

वायुमण्डलया प्रदुषण अप्वयाः वनीबलय् अन्तर्राष्ट्रिय उडानय् लिच्वः लाइगु खतरा खँ धाःगु दु । अयसां आः हे उडानय् लिच्वः लाइगु खतरा धाःसा मदु ।

मौसमविद् पौडेलया कथं, नेपाःया वायुमण्डलया पारदर्शिता ३ हजार मिटरय् क्वाहाँ वःगु दु । पौडेलं धाःगु दु, “अन्तर्राष्ट्रिय उडानय् वायुया पारदर्शिता ३ हजार मिटरतक जुइमाः । वसिबें म्हो जूसा उडानय् लिच्वः लाइ । नेपाःया वायुमण्डलया पारदर्शिता ३ हजार मिटरपाखें क्वय् क्वाहाँ वःगुलिं तत्काल उडानय् हे लिच्व लाइगु अवस्था धाःसा मदु ।”

अरब सागरया चक्रवात, नेपाः थ्यनीला ?

नेपाः व भारतया वायुमण्डल प्रदुषित जुयाच्वंगु इलय् अरव सागरय् धाःसा चक्रवात खनेदूगु दु । मौसमविदपिनिगु कथं, ‘माहा’ नां ब्यूगु उगु चक्रवात आः अरब सागरया दक्षिणपूर्वी भागं विकसित जुयाः उत्तर पश्चिम दिशापाखे वंगु दु ।

थ्व चक्रवातं उत्तर पश्चिम दिशा ज्वंसां नं तत्काल थुकिया लिच्वः नेपालय् धाःसा मलाइगु मौसमविद् पौडेलं धाःगु दु ।

Categorized in अन्तर्राष्ट्रिय