nepal life 2076 3 18

अमेरिकाय् तःभुखाय् ब्वल, शक्तिशाली लिभुखाय् ब्वइगु आशंका !

नेवा: अनलाइन न्युज | २०७६ आषाढ २०, शुक्रबार १०:३२:०६

अमेरिकाय् तःभुखाय् ब्वःगु दु । क्यालिफोर्निया राज्यया लस एन्जल्सं उत्तरपूर्वय् च्वंगु रिजक्रेस्ट नगर केन्द्रविन्दु जुयाः ६.४ रेक्टर स्केलया भुखाय् ब्वःगु खः ।

दक्षिण क्यालिफोर्नियाया निगू दशक थुखेया हे दकले शक्तिशाली तःभुखाय् कथं काःगु थुगु भुखाचं भौतिक क्षति जूगु विवरण वःसां नं मानवीय क्षतिबारे जानकारी मवःनिगु अन्तर्राष्ट्रिय संचारमाध्यमं जानकारी ब्यूगु दु ।

भुखायया धक्का नेभादा राज्यया लस भेगासय् नं महसुस जूगु खः । अमेरिकाया स्वतन्त्रता दिवसया दिं ब्वःगु भुखाचं दक्षिण क्यालिफोर्नियाय् दकले अप्वः क्षति जूगु दु ।

भुखाय् लिपा थ्यंमथ्यं निगू दर्जन थासय् मिँ च्याःगु खः । गुकिं सुं सुं घाःपाः जूगु व इमिगु उद्धार यानाः अस्पताल छ्वःगु सरकारी अधिकारीपिन्सं जानकारी ब्यूगु दु ।

भूगर्वविद् प्राध्यापक जन रन्डनं बीबीसीयात धाःकथं केन्द्रविन्दु लाःगु रिजक्रेस्टय् आपालं क्षति जूगु दु । आपालं मनूत च्वनाच्वंगु क्षेत्रसिबें छुं भच्चा तापाक्क केन्द्रविन्दु जूगुलिं क्षति म्हो जूगु वय्कःया धापू दु ।

क्यालिफोर्नियाया गभर्नर ज्याकुथि मातहतया आपतकालीन ज्याकुथिया प्रवक्ता ब्राड एलेक्जेन्डं खोज व उद्धार ज्या जुयाच्वंगु धाःगु दु ।

अमेरिकी राष्ट्रपति डोनाल्ड ट्रम्पं नं भुखाय् लिपा ट्वीट यानाः स्थिति नियन्त्रणय् दूगु धाःगु दु ।

६.४ रेक्टर स्केलया भुखाय् लिपा मद्दिक्क लिभुखाय् ब्वयाच्वंगु दु । अमेरिकी भूगर्भ निकाय (यूएसजी)या भुखाय् विद्ं मेमेगु आपालं लिभुखाय् ब्वयेफइगु धाःगु दु ।

लिभुखाय् मध्य छुं शक्तिशाली नं जुइफइगु धासें वय्कलं सचेत याकूगु दु ।

Categorized in अन्तर्राष्ट्रिय