telecom 18 kartik 2076

अबुपाखे भिं जिवनया लागि सुवाः फयेगु दिं अबुया ख्याः स्वयेगु न्हिं

प्राडा चुण्डा बज्राचार्य

गुंलागाः औँसी अर्थात भाद्रकृष्ण औँसीकुन्हु नेवाः जातिया नापनापं मेमेगु जातिं नं थःत जन्म ब्यूम्ह अबुया दिर्घायु कामना यासे, अबुपाखे भिं जिवनया लागि सुवाः
फयेगु दिं खः । बैशाखकृष्ण औँसीकुन्हु थःत जन्मयाःम्ह मांया ख्वाः स्वये थें भाद्रकृष्ण औँसीकुन्हु अबुया ख्वाः स्वयेगु दिं खः ।

अबुया ख्वाः स्वयेगु औँसीयात कुशेऔँसी धकाः नं धाः । छाय्धाःसा थ्वकुन्हु सराद यायेगु माःगु पवित्रगु कुश गुरु पुरोहितपाखें पवित्रगु मन्त्रं साधना यानाः कुश
लयाः दँछि यंक पूजा यायेत माःगु उगु कुश छेँय् छेँय्  दुत हयेगु दिं जुगूलिं कुशेआँैसी धकाः नं धाःगु खः । थुबलय् कुश छेँय् दुतहल धायेवं भिं जुइ धकाः नं
धायेगु याः । अबुया ख्वाः स्वयेगु औँसीया दिंयात गोकर्णआँैसी नं धाः । खुसि बागमति खुसिया संगम जूगु तीर्थयात गोकर्ण दोभानय् अबु स्वर्गे जुइधुंकुपिं काय्
म्ह्याय्पिसं म्वःल्हुयाः अबुया नामय् सिधा निसलाः व सराद याइगु जुगुलि थ्व दिंयात गोकर्णऔँसी धकाः धाःगु खः । विशेष यानाः गोकर्णऔँसीकुन्हु थ्व गोकर्णया
दोभानय् मेला जुइ । थ्व मेलाय् विशेष यानाः अबु मदुपिं जक वनी ।
 
बौद्धमार्गीपिनिं स्वर्गे जुइ धुंकाः लय् लय्पतिं सराद याइगु तीर्थ मध्यय् दकले न्हापां थ्व तीर्थय् वनाः सराद यायेगु चलन दु । उकिं मृत्यु जूम्ह यायेगुया लागि
झिंनिगू तीर्थय् सराद याइगुलिइ थ्व गोकर्णया तीर्थय् नं सराद यायेमाः । बौद्धतय् झिनिगू तीर्थ मध्यय्  छगू तीर्थ कथं कयातःगु तीर्थ खः । अबुया ख्वाः स्वयेकुन्हु
अबु मदुपिसं थ्व तीर्थय् स्वत धाःसा थः अबुया ख्वाः हे खनी धयागु धापू दु । अबु मदय् धुंकाः अबुया नामय् दँय्दसं सराद यायेगुया लागि दकले न्हापां गोकर्णय्
थ्व हे थासय् वनाः सराद यायेमाः । अले जक दँय्दसं सराद याइबलय् मदुम्ह अबुयात वनी धकाः धायेगु चलन दु ।

गोकर्णया तीर्थया अबुया ख्वाः खनीगु छपु बाखं हिमवत खण्डय् उल्लेख यानातःगुु दु । छगू इलय् म्ह व्यापार यानाः जीविका यानाःच्वम्ह छम्ह मिसाया गर्भधारण
जुल । गर्भधारण याःम्ह मिसा स्वयम् गुम्ह मिजंया संसर्ग गर्भधारण जुल धयागु मस्यू । यक्व मिजंत नाप संसर्गय् वइम्ह मिसा जूसां मातृत्वया भावना दयावयाः
थःगु गर्भय् दुम्ह मचायात नं जन्म हे यात । वयागु नां दन्तुर धकाः नामकरण यात । मचा तःधिकः जुसँेलि थः मांयात थः अबु सु धकाः न्यन । स्वयम मिसां
मस्यू उकिं लिसः बी मफुत । अबु थाःगा मदुम्ह दन्तुर  तःधिकः जुसेँलि थःमायात नं त्वःता थः अबु सु धकाः मामां वन । थः अबु माले मफुगुलिं पुलह धयाम्ह
ऋषियाथाय् वनाः थःगु वेदना प्वंकल । पुलह ऋषिं गोकर्णेश्वर महाद्यःया पूजा यानाः भक्ति भाव यात धायेवं छिमि अबु सु धयागु म्हसी धकाः धाःगुलि दन्तुर नं
गोकर्णश्वर  महाद्यःयात पूजा यानाः भक्तिभाव यात । नापनापं थः अबुया नामय् गोकर्णया तीर्थया नसा तयेगु नं याना वयाच्वन । छन्हु थथे थः अबुया नामय्
नसा गोकर्णया तीर्थया तये त्यंबलय् तीर्थय् आपालं मनूया ख्वाःपा खन । ख्वाःपा फुकं मृत्यु जुइ धुकूपिं जूगुलिं दन्तुर अबुया नामय् ब्यूगु नसा मृत्यु जुपिं ख्वःपा
फुकसिनं जि हे छिमि अबु खः धकाः धयाच्वन । धाथेंयाम्ह थः अबु सु खः धकाः दन्तुर अलमल जुयाच्वंगु ध्यानय् च्वनाः च्वम्ह विश्रवा ऋषि खन । व हे ऋषि थःगु
साधनां सृष्टिकर्ता व्रम्हायात दन्तुरया अबु म्हसिके ब्यु धकाः धासेलि व्रम्हा वयाः धाथेम्ह अबु थ्व धकाः म्हसीका बिल । ब्रम्हां क्यम्हेसित हे थः अबु धकाः म्हसिकाः
कुश, हाम्व, लः तयाः पिण्ड तयाबिल । थः अबु म्हसीकाः पिण्ड तःगु दिं धयागु भाद्रकृष्ण औँसीकुन्हु खः । थ्व खंनिसें यानाः भाद्रकृष्ण  औँसीकुन्हु अबु मदुपिंस
गोकर्णेश्वर महादेवयात पूजा यानाः अबुया नामय् गोकर्णय्  पिण्ड तयेगु, श्राद्ध यायेगु, निसलाः तयेगु, सिधा तयेगु जूगु खः । अबुया नामय् सराद याइपिसं  थ्व
हे गोकर्णश्वर महादेवयात पूजा यानाः पिण्ड तयाः गोकर्ण तीर्थया दोभानय् चुइका  व्छइगु   खः ।

अबु मदुपिंस गोकर्णेश्वर महादेवयात पूजा यनाः मदुम्ह अबुया नामय् गोकर्णय् तीर्थय् थःगु इच्छा अनुसार भक्तिभावं नसा वा पिण्ड तःगु जूगुलिं गोकर्णेश्वर
महादेवया प्रादुर्भाव गथे जुयाः जुल धयागु खँ थथें खः ।

किरातकालय् मनूतय्गु जीवनचर्चा गथेच्वं धकाः स्वयेत स्वर्ग महाद्यः मनूया रुप कयाः पशुपतिया श्लेषमान्तक जःखः छम्ह द्यःपालाःया भेषय् जुइगु जुयाच्वन ।
लिपा अर्जुन महाद्यःया मामां वःबलय् श्लेषमान्तक वनय् मनूया रुपय् नाप लात । तर मनू रुपी महादेवं थःहे महाद्यः धकाः मधाः । अर्जुन किराती जुजुयात
ब्वःब्यूगुलिं महाद्यः व अर्जुनया दथुइ ल्वापू जुल । ल्वांपु जुजुं लिपा द्यः बी थें च्वंबलय् अर्जुन थः महाद्यःया उपासनाय् च्वनाः ल्वापु दिका च्वंगुलि महाद्यःनिं पूजा
याये धकाः पूजा याःबलय् पूजा याक्व महाद्यः रुपी मनूयात वन ।