ad 2076 5 18

अफगानिस्तानय् ब्याहा समारोहय् आत्मघाती विस्फोट

नेवा: अनलाइन न्युज | २०७६ भाद्र १, आइतबार १२:०५:३०

अफगानिस्तानया छगू ब्याहा हलय् आत्मघाती बम विस्फोट जूगु दु । विस्फोटय् आपालं मनूत हताहती जूगु धाःसा. नं पायछिगु विवरण वःगु मदुनि ।

काबुलय् च्वंगु हलय् ब्याहा समारोह जुयाच्वंगु इलय् वंगु बहनी २२ः४० ता इलय् बम विस्फोट जूगु रोयटर्सं जानकारी ब्यूगु दु । घटनाय् कम्ती नं २० म्ह मनूत घाःपाः जूगु दु । इमित उद्धार यानाः अस्पताल थ्यंकूगु खः ।

प्रत्यक्षदर्शीपिन्सं ब्याहा समारोह जुयाच्वंगु इलय् छम्ह मनुखं आत्मघाती हमला याःगु बीबीसीयात धाःगु खः । इमिसं घटनास्थलय् सीपिं खंगु नं धाःगु दु ।

ब्याहा समारोहस सहभागी मोहम्मद फरगं थः मिसापिनिगु पुचलय् लानाच्वंगु इलय् मिजंत च्वनीगु थासय् लक्षित यानाः तच्वःगु विस्फोट याःगु धाःगु दु ।

फगानिस्तानय् हलय् सलंसः मनूत मुना: ब्याहा यायेगु परम्परा दु । गन मिजंत छखे व मिसात व मचात मेखे ब्यागलं ब्यागलं थासय् च्वनेगु याइ ।

प्रत्यक्षदर्शी फरगं धाःकथं विस्फोट धुंकाः फुक्क मनूत ग्याःचिकुइ लानाः पिहाँ वःगु खः । विस्फोटया २० मिनेटतक ब्याहा हलय् कुँ हे कुँ जाःगु खः । वं मिजंत च्वनीगु थासय् मनुत म्वाः कि घाःपाः जूगु दु धैगु खँय् छुं धायेमफूगु अवस्था जूगु नं धाःगु दु ।

आन्तरिक मामिला मन्त्रालयया प्रवक्ता नश्रत रहीमीं शनिवाःया विस्फोटं मनूत हताहती जूसां नं विवरण मुंकेगु ज्या जुयाच्वंगु धाःगु दु ।

रहीमीं धाःगु दु, “विस्फोटं तःधंगु हताहती जूगु दु । जिपिं विवरण मुंकेगु हे अवस्थाय् दूगुलिं क्षतिबारे धायेफूगु अवस्था मदु ।” विस्फोटया जिम्मा आःतक सुनानं काःगु मदुनि ।

ब्म विस्फोट जूगु थाय् सिया मुस्लिम बाहुल्य क्षेत्र खः । अफगानिस्तानलिसें पाकिस्तानय् दुपिं अल्पसंख्यक सिया हजारा समुदाय सुन्नी मुस्लिम आर्मी, तालिवान व इस्लामिक स्टेट समूहया निशानाय् लानाः वयाच्वंगु दु ।

थ्वसिबें न्ह्यः काबुलया प्रहरी स्टेशन पिने तालिवान समुह नं ग्यानापूगु बम विस्फोट याःगु खः । गुकी लानाः कम्ती नं १४ म्ह अफगानीया ज्यान वंगु खःसा थ्यंमथ्यं १५० म्ह घाःपाः जूगु खः ।

शुक्रवाः जक पाकिस्तानी सहर क्वेटा लिक्कया मस्जिदय् विस्फोट जुयाm तालिवानी नेता हिवतुल्लाह अखुण्डजादाया दाजुया ज्यान वंगु खः । उगु आक्रमण सुनां याःगु खः धैगु आःतक सीमदुनि ।

तालिवान व अमेरिकां अफगानिस्तानय् शान्ति पलिस्थाया नितिं धासें द्वलंद्वः सेना तैनाथ याःसां नं थप हिंसाया घटनाय् म्हो जुइगु पलेसा अप्वयाः वनाच्वंगु दु ।

Categorized in अन्तर्राष्ट्रिय